काठमाडौँ – नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाल–भारत सीमामा देखिने समस्या समाधानमा पहल गर्ने प्रतिबद्धता जनाएका छन्।

तराई–मधेस जागरण अभियानअन्तर्गत बुधबार बेलौरी पुगेका प्रचण्डले नगरप्रमुख पोतिलाल चौधरीले बुझाएका ज्ञापनपत्र बुझ्दै समस्या समाधानका लागि पहल गर्ने प्रतिबद्धता जनाएका हुन्। 

 ‘यस नगरपालिकामा म यसअघि पनि विभिन्न कार्यक्रमका अवसरमा आएको छु। यहाँका समस्याहरू बारे म जानकार छु। नेपाल–भारत सीमामा देखिने समस्या, सुकुम्वासी र अव्यवस्थित बसोबासीको समस्या समाधानका लागि म विपक्षी दलको नेताको हैसियतमा गर्न सकिने सबै प्रकारको सहयोग गर्ने प्रतिबद्धता व्यक्त गर्छु’, उनले भने। 

कार्यक्रमको क्रममा बेलौरी नगरपालिकाका प्रमुख पोतिलाल चौधरीले अध्यक्ष प्रचण्ड समक्ष नगरका समस्या र आवश्यकताहरू समेटिएको ज्ञापनपत्र पेस गरेका थिए।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं । वैदेशिक रोजगार विभाग अन्तर्गतको ई.पी.एस. कोरिया शाखाले कोरिया जाने तयारीमा रहेका व्यक्तिहरूका लागि निःशुल्क अनलाइन भाषा कक्षा उपलब्ध गराउने भएको छ । शाखाले १५, वैशाख २०८२ मा एक सूचना जारी गर्दै ईपीएसमार्फत् कोरिया जाने तयारीमा रहेकाका लागि निःशुल्क अनलाइन भाषा कक्षा उपलब्ध गराउने जानकारी दिएको हो । 

कोरियन भाषा परीक्षा (EPS-TOPIK) उत्तीर्ण गरी योग्य सूची (Roster) मा समावेश भएका सम्पूर्ण व्यक्तिहरूका लागि नि:शुल्क अनलाइन कोरियन भाषा कक्षा सञ्चालन गर्ने निर्णय भएको सूचनामा उल्लेख छ । इच्छुक व्यक्तिहरूले यहाँ क्लिक गरेर भाषा परीक्षा उतिर्ण भएका विद्यार्थीहरूले वैदेशिक रोजगार विभाग अन्तर्गतको ई.पी.एस कोरिया शाखाबाट प्राप्त आईडी र पासवर्ड प्रयोग गरी निःशुल्क अनलाइन कक्षा लिन सक्नेछन् । अथवा यहाँ क्लिक गरेर भाषा कक्षा सम्बन्धी विवरण लिन सकिनेछ । 

सूचना 

पछिल्लो अध्यावधिक: बैशाख १७, २०८२ ९:११

काठमाडौं । मोरङको विराटनगर महानगरपालिका-१३ बाट नक्लली नोट सहित १ जना भारतिय नागरिकलाई प्रहरीले पक्राउ गरेको छ । पक्राउ पर्नेमा भारत बिहार अररियाका १९ बर्षीय सिम्पी बैसन्ति रहेकी छन् ।

वैशाख १६ गते विराटनगर-१३ मा रहेको किराना पसलमा सामान किन्ने क्रममा सिम्पी बैसन्तिले भारतीय ५ सय रुपैयाको नोट पसलेलाई दिएकोमा उक्त नोट नक्कली रहेको शंका लागी पसल धनीले प्रहरीलाई खवर गरेका थिए ।

तत्काल इलाका प्रहरी कार्यालय रानीबाट खटिएको प्रहरी टोलीले चेकजाँचको क्रममा उनकोकोसाथबाट ५ सय दरको ७ वटा नक्कली भारतीय नोट र नेपाली रुपैयाँ ३ हजार १ सय सहित नियन्त्रणमा लिएको हो ।

नक्कली नोट सहित पक्राउ परेकी उनको आवश्यक कानूनी कारवाही तथा थप अनुसन्धान भईरहेको छ ।

काठमाडौं – स्वास्थ्य तथा जनसंख्या मन्त्रालयले बिरामीहरुको उपचारमा संलग्न सबै सरकारी चिकित्सकहरुलाई कागजातमा आफ्ना सबै विवरण खुलाउन निर्देशन जारी गरेको छ ।

मन्त्रालयको गुणस्तर मापन तथा नियमन महाशाखाले सबै संघीय अस्पताल तथा प्रतिष्ठानहरुलाई पत्राचार गर्दै अस्पतालमा उपचारका लागि आउने बिरामीको आवश्यकताअनुसारको रेडियोलोजी, प्रयोगशाला र अन्य परीक्षणमा सिफारिस गर्ने चिकित्सक तथा स्वास्थ्यकर्मीको पूरा नाम, विशेषज्ञता, काउन्सिल दर्ता नम्बर तथा सहि छाप बिरामी रिपोर्टमा खुलाउन भनेको छ ।

निर्देशनले बिरामीको उपचार तथा फलोअपमा सहजता ल्याउने अपेक्षा गरिएको मन्त्रालयका प्रवक्ता डा. प्रकाश बुढाथोकीले बताए । साथै, यस व्यवस्थाले अनावश्यक परीक्षण रोक्न तथा परीक्षण सम्भव हुँदा हुँदै अस्पतालबाहिर हुने रेफरसमेत रोक्ने अपेक्षा गरिएको छ ।

हाल चिकित्सकीय विवरण पेस्क्रिप्सनमा पूरा नहुँदा बिरामीको उपचार तथा त्यसका क्रममा भएका खराबी पहिचानमा समेत समस्या परेको बताइन्छ । अब चिकित्सकीय विवरण अनिवार्य गरिंदा त्यसले चिकित्सकलाई थप जिम्मेवार र जवाफदेही बनाउन समेत मद्दत मिल्ने विश्वास गरिएको छ ।

स्वास्थ्य तथा जनसंख्या मन्त्री प्रदीप पौडेलले सरकारी अस्पतालमा बिरामीहरुलाई प्रभावकारी सेवा दिनका लागि उपचारात्मक सेवा सुधारमा जोड दिंदै आइरहेका छन् । जारी निर्देशनले यसमा मद्दत पुग्ने अपेक्षा गरिएको उनको निजी सचिवालयले जनाएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । हामीले अब फोनलाई सामान्य फोन मात्र नभई खल्तीमा अटाउने एक पूर्ण कम्प्युटर (पीसी) को रूपमा हेर्न थाल्नुपर्ने समय आएको छ । हामीमध्ये धेरैलाई फोन सानो कम्प्युटर हो भन्ने थाहा भए पनि, हामी यसलाई त्यसरी प्रयोग गर्ने वा सोच्ने गर्दैनौँ । परम्परागत रूपमा केही कामलाई ‘पीसीको काम’ र केहीलाई ‘फोनको काम’ भनेर छुट्याउने हाम्रो सोचाइ परिवर्तन हुनुपर्ने आवश्यकता छ ।

वास्तविकता के हो भने, लाखौँ मानिसहरूले पहिले नै आफ्नो स्मार्टफोनलाई पीसी जसरी प्रयोग गरिरहेका छन् । विश्वका धेरै ठाउँमा, स्मार्टफोन नै एउटा परिवारसँग भएको एक मात्र कम्प्युटर हो । विकसित क्षेत्रहरूमा पनि स्मार्टफोनको प्रयोग व्यापक छ ।

डेस्कटपमा सामान्यतया गरिने कामहरूका लागि बनाइएका मोबाइल एपहरू लाखौँ पटक डाउनलोड भएका छन् । जस्तै, लेख्ने कामका लागि मात्रै धेरै एपहरू उपलब्ध छन्, जसलाई हजारौँ र लाखौँ मानिसहरूले डाउनलोड गरेका छन् । यसले देखाउँछ कि धेरै मानिसहरू फोनमै लेख्ने जस्तो काम गरिरहेका छन्, जुन पहिले पीसीमै राम्रो मानिन्थ्यो । अफिस सुइट्स, फोटो एडिटर र भिडियो एडिटर जस्ता एपहरू पनि ठुलो सङ्ख्यामा डाउनलोड भएका छन्, जसले मानिसहरू फोनबाटै सिर्जनात्मक काम गरिरहेको प्रमाण दिन्छ।

फोनको प्रोसेसिङ पावरमा अब कुनै सीमितताको विषय रहेन । सम्भवतः तपाईँसँग अहिले रहेको फोन पुराना कयौँ ल्यापटपहरू भन्दा शक्तिशाली छ र यसले बाह्य मनिटरलाई सजिलै चलाउन सक्छ । यदि तपाईँसँग सामान्य बजेटको फोन मात्र छ भने पनि, यसले बजेट पीसीले दिने भन्दा राम्रो अनुभव दिन सक्ने सम्भावना छ । फोनको मोबाइल जीपीयूले ल्यापटपको इन्टिग्रेटेड ग्राफिक्सभन्दा छिटो काम गर्न सक्छ, विशेष गरी भिडिओ रेन्डरिङ जस्ता कार्यहरूमा ।

एन्ड्रोइडको इन्टरफेस पनि डेस्कटप जस्तै बन्दै गएको छ । ठुलो स्क्रिन, फोल्डेबल फोन वा ट्याब्लेटहरूमा टास्कबार र डकहरू हुन्छन् । फाइल म्यानेजर र अन्य एपहरू पनि पीसी जस्तै देखिन्छन् । एपहरूलाई सानो फ्लोटिङ विन्डो बनाउने, सार्ने र रिसाइज गर्ने जस्ता फिचरहरू पनि उपलब्ध छन्, जुन विन्डोज वा म्याकमा जस्तै हो ।

केही एन्ड्रोइड फोनहरू त स्पष्ट रूपमै पीसी अनुभव दिन सक्षम छन् । सामसङका प्रिमियम फोनहरूमा सामसङ डेक्स (Samsung DeX) मोड हुन्छ, जसले फोनलाई बाह्य डिस्प्लेमा जोड्दा डेस्कटप जस्तै अनुभव दिन्छ । मोटोरोलामा पनि स्मार्ट कनेक्ट (Smart Connect) भन्ने यस्तै सुविधा छ । गुगलले पनि अब एन्ड्रोइडमा सिधै डेस्कटप मोड समावेश गर्ने काम गरिरहेको छ । अधिकांश मोबाइल ब्राउजरहरूमा डेस्कटप मोड नै छ । यसरी, फोन वास्तवमा एउटा पकेट कम्प्युटर नै हो भन्ने पुष्टि हुन्छ ।

समाजको अपेक्षा पनि बदलिएको छ । पहिले घरमा डेस्कटप कम्प्युटर हुनु सामान्य अपेक्षा थियो, अहिले त्यो स्थान फोनले लिएको छ । एप डाउनलोड गर्ने, नेभिगेसन प्रयोग गर्ने, क्यूआर कोड स्क्यान गर्ने, मोबाइल पेमेन्ट गर्ने जस्ता कामहरूका लागि फोन हुनु आवश्यक मानिन्छ । यदि एउटा मात्र डिभाइस किन्नु पर्ने अवस्था छ भने, अहिले फोन नै बढी उपयुक्त विकल्प हो ।

फोनले पहिले परम्परागत पीसीबाट मात्र गर्न सकिने किसिमका सबै आवश्यक कामहरू गर्न सक्छ । फोनलाई ठुलो बनाउने फोल्डेबल जस्ता फर्म-फ्याक्टरले यसलाई अझ सजिलो बनाइरहेको छ । तर सामान्य फोनमा पनि सही एक्सेसरिज प्रयोग गरेर पीसी जस्तै काम गर्न सकिन्छ । पीसी बनाउने तरिकाहरू अहिले धेरै छन् र परम्परागत डेस्कटप वा ल्यापटप त्यसमध्ये एक मात्र हो । फोन त्यस्तै अर्को विकल्प हो ।

यस हिसाबले अब फोनलाई हेर्ने दृष्टिकोण बदल्न जरुरी छ र यसको क्षमतालाई स्वीकार गर्न र यसलाई एक शक्तिशाली पकेट पीसीको रूपमा प्रयोग गर्न थाल्नु नै अबको स्मार्ट तरिका हो । 

पछिल्लो अध्यावधिक: बैशाख १७, २०८२ ११:३८

काठमाडौं। सरकार र आन्दोलनरत शिक्षक महासंघबीच आज पनि वार्ता हुँदैछ। हिजो राति अबेरसम्म भएको वार्ता निष्कर्षमा नपुगेपछि आज दिउँसो दुई बजे पुनः वार्ता हुन लागेको हो। सो वार्ता शिक्षा मन्त्रालयमा हुनेछ।

नेपाल शिक्षक महासंघका महासचिव तुला बहादुर थापाका अनुसार महासंघले प्रस्तुत गरेको ९ बुँदे प्रस्तावका बारेमा टुंगोमा पुग्ने र सोही टुंगोमा पुगे पछि पहिलो चरणमा मन्त्रिपरिषदवाट निर्णय गराउने योजना रहेको छ।

दोस्रो चरणमा भने संसदवाट बिधेयक पारित गराउने सर्तमा आज मन्त्रालयमा पुनः वार्ता हुन लागेको हो। यद्यपि, वार्ता जारी रहे पनि काठमाडौं केन्द्रित आन्दोलन भने नयाँ बानेश्वर-माइतीघर खण्डमा जारी रहेको अध्यक्ष लक्ष्मी किशाेर सुबेदीले जानकारी दिए।

काठमाडौँ – नेपाली बजारमा आज सुनको मूल्य सामान्य अंकले घटेको छ । नेपाल सुनचाँदी व्यवसायी महासंघका अनुसार आज छापावाल सुन तोलामा १ लाख ८८ हजार १०० रुपैयाँ कायम भएको छ । 

यस अघि मंगलबार छापावाल सुन तोलामा १ लाख ८८ हजार ८०० रुपैयाँ कायम भएको थियो । आज छापावाल सुनको मूल्यमा ७०० रुपैयाँ घटेर कारोबार भइरहेको छ ।

चाँदीको मूल्य प्रतितोला रु ५ ले घटेर एक हजार ९६५ कायम भएको छ । मङ्गलबार पनि सोही परिमाणको चाँदी रु एक हजार ९७० मा कारोबार भएको थियो ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । अब गुगलको नोटबुकएलएम (NotebookLM) मार्फत आफ्नो अध्ययन वा रिसर्चलाई पोडकास्टको रूपमा नेपाली भाषामा समेत सुन्न सकिने भएको छ । गुगलको नोटबुकएलएममा रहेको ‘अडियो ओभरभ्युज’ (Audio Overviews) नामक यो टुलले तपाईँले उपलब्ध गराएका स्रोतहरूमा रहेका मुख्य विषयहरूको सारांशलाई दुई ओटा एआई होस्टहरूबिचको कुराकानीको रूपमा प्रस्तुत गर्दछ। यो कुनै व्यक्तिपरक विचारको रूपमा नभई तपाईँले अपलोड गरेका स्रोत सामग्रीमा रहेर तयार हुन्छ।

यसअघि अङ्ग्रेजीमा मात्रै उपलब्ध यो सुविधा अहिले भने ५० भन्दा बढी भाषाहरूमा विस्तार गरिएको छ । यसमा नेपाली भाषाका साथै स्पेनिस, पोर्चुगिज, फ्रेन्च, हिन्दी लगायतका छन् ।

यहाँ क्लिक गरेर एआई पोडकास्टमा उपलब्ध भाषा बारे थाहा पाउन सक्नु हुनेछ । यदि तपाईँ नेपालीमा अडियो सुन्न चाहनुहुन्छ भने, नोटबुकएलएमको माथिल्लो दायाँ कुनामा रहेको सेटिङ्समा गएर ‘आउटपुट ल्याङ्ग्वेज’ (Output Language) छनौट गरी नेपाली भाषा सेट गर्न सक्नुहुन्छ । यही समाचार लेखमा आधारित एआई पोडकास्ट तपाईँले माथिको अडियोमा सुन्न सक्नु हुनेछ । 

डिफल्ट अर्थात् पूर्व निर्धारित रूपमा यसको आउटपुट भाषा तपाईँको गुगल अकाउन्टको भाषामा सेट भएको हुन्छ । अडियो ओभरभ्युज तयार गर्नका लागि तपाईँले नोटबुक खोलेर दाहिनेपट्टिको ‘स्टुडियो’ (Studio) प्यानलमा रहेको ‘अडियो ओभरभ्यु’ खण्डमा गएर ‘जेनरेट’ (Generate) बटनमा क्लिक गर्नुपर्ने हुन्छ। तपाईँले ५०० क्यारेक्टरसम्मको ‘स्टियरिङ प्रम्प्ट’ (steering prompt) थपेर अडियोलाई कुनै खास विषयमा केन्द्रित गराउन पनि सक्नुहुन्छ । अडियो तयार हुन केही मिनेटसम्म लाग्न सक्छ ।

यद्यपि, गुगलले गैर-अङ्ग्रेजी भाषाको सपोर्ट अझै ‘बिटा’ (Beta) चरणमा रहेको र सहि आउटपुट नआउन सक्ने बताएको छ । गैर-अङ्ग्रेजी अडियो चेकजाँच गर्नुपर्ने हुन्छ । यसको गुणस्तर सुधारका लागि गुगलले काम गरिरहेको र प्रयोगकर्ताको प्रतिक्रियाको आधारमा यसलाई परिष्कृत गर्दै जाने बताएको छ । अडियो ओभरभ्युज (आवाज सहित) एआईबाट तयार पारिने भएकाले गलत जानकारी वा अडियोमा केही गडबडी हुन सक्ने सम्भावना रहन्छ ।

यो फिचर विश्वका २०० भन्दा बढी देशहरूमा विस्तार भइसकेको छ । यसले एआई होस्टहरूलाई गाइड गर्ने र उनीहरूसँग अन्तर्क्रिया गर्ने सुविधा पनि दिन्छ । अन्तरक्रियात्मक मोड (Interactive mode) पनि हाल बिटामा रहेको छ र अङ्ग्रेजीमा मात्र उपलब्ध छ । यो फिचर नयाँ तयार गरिएका अडियो ओभरभ्युजका लागि मात्र उपलब्ध छ । अन्तरर्क्रियात्मक मोड प्रयोग गर्दा तपाईँको आवाज र संवाद स्टोर नगरिने गुगलले बताएको छ ।

तयार भएको अडियो ओभरभ्युजलाई शेयर गर्ने विभिन्न तरिकाहरू छन् । तपाईँ यूआरएल बनाएर सार्वजनिक रूपमा शेयर गर्न सक्नुहुन्छ। यो सुविधा ग्राहक अकाउन्टहरूका लागि मात्र उपलब्ध छ, इन्टरप्राइज वा ईडीयू अकाउन्टबाट भने यो सुविधा प्रयोग गर्न सकिन्न । तपाईँ सम्पूर्ण नोटबुक शेयर गर्न पनि सक्नुहुन्छ । वा, अडियोलाई डाउनलोड गरेर पनि पठाउन सकिन्छ ।

पछिल्लो अध्यावधिक: बैशाख १७, २०८२ १०:४०