काठमाडौँ । हालै फेसबुकलगायत सामाजिक सञ्जालमा काठमाडौँ महानगरपालिकाका प्रमुख बालेन्द्र शाह (बालेन) को निवासमा बम भेटिएको भन्दै एउटा भिडिओ तीव्र गतिमा फैलिरहेको छ ।

भिडिओमा सुरक्षाकर्मीहरूले एक व्यक्तिलाई हत्कडी लगाएर लगिरहेको देखिन्छ भने भिडिओमा आवाज दिने व्यक्तिले बम भेटिएको र बम राख्ने व्यक्ति पक्राउ परेको बताएका छन् । भिडिओको क्याप्सनमा पनि बालेनको घरमा बम भेटिएको दाबी गरिएको छ । तर, टेकपाना फ्याक्टचेकले गरेको अनुसन्धानले यो भिडिओ पूर्ण रूपमा गलत र बालेनको निवाससँग असम्बन्धित भएको स्पष्ट पारेको छ । 

दाबी

२०८२ वैशाख २३ गते बिहान १०:४४ बजे ‘मेरो देश नेपाल’ नामक फेसबुक पेजले सनसनी क्याप्सनका साथ भिडिओ पोस्ट गर्‍यो: “बालेन को घरमा बम भेटिएको छ” । ५८ सेकेन्डको उक्त भिडिओमा आवाज दिने व्यक्ति आत्तिएको शैलीमा बोल्छन्, “दर्शकवृन्द यहाँ चिच्याइरहेको अवस्था छ …पक्रिएको छ दर्शकवृन्द बम राख्नेलाई यहाँ एउटा बम भेटिएको थियो । यहाँ तपाईंले देखिरहनु भएको छ—(यसैबिच एक महिला बोल्छिन्- उलाई ठोक्नुस्, यसलाई ठोक्नुस् ।) दर्शकवृन्द प्रहरीले यहाँ बम राख्ने व्यक्तिलाई भेटेर हत्कडी लगाएर ल्याएको छ । दर्शकवृन्द यहाँ बिहानदेखि बम भेटिसकेपछि एक किसिमको कोला.. हानाहान भनिरहेछन्, (ब्याकग्राउन्डमा ठोक ठोक भनेको सुनिन्छ) …(भिडिओमा एक व्यक्ति देखिन्छन् र भन्छन्- ‘मेरो घर पनि यही हो । म ठ्याक्कै बिहान आउँदा खेरी क्रममा चाहिँ– मेरो छिमेकी सुनपसलको दाइले मलाई आएर देखाउनुभयो, चिठ्ठी देखाउनुभयो के..चिठ्ठीमा के लेखिएको थियो भने खोटाङ हलेसी सुनपसलका व्यवसायी उहाँले तपाईंलाई पाँच लाख रुपैयाँ बेलुकासम्म जसरी भए पनि दिनुहोला भनेर लेखेको रहेछ आग्रह गर्नुभएको छ।” चिठीमा के लेख्या थियो भन्दा खेरि उहाँको अ खोटाङ हलेसी सुन पसलको व्यवसायी छ तपाईँले के रे मलाई चाहिै नि पाँच लाख रुपैया चाहिँ नि अ बेलुकासम्म जसरी पनि दिनुहोला भनेर लेखेको रहेछ ।”

भिडिओमा प्रहरीले एक व्यक्तिलाई हत्कडी लगाएर लगिरहेको दृश्य देखिन्छ । घटनास्थलमा मानिसहरूको चिच्याहट र भिडभाड पनि सुन्न सकिन्छ । भिडिओमा बम भेटिएको र बिहानैदेखि हल्लीखल्ली मच्चिएको दाबी गरिएको छ । भिडिओअनुसार त्यहीँ नजिकै रहेका खोटाङ हलेसीका एक सुन पसलका व्यवसायीलाई कसैले पाँच लाख रुपैयाँ बेलुकासम्म दिनुहोला भन्दै धम्कीपूर्ण चिठी दिएको रहेको बुझ्न सकिन्छ । यसबाहेक भिडिओमा घटनाको स्पष्ट विवरण दिने अन्य कुनै ठोस आधार देखिँदैन । तर, भिडिओको क्याप्सनमा उत्तेजक रूपमा ‘बालेनको घरमा बम भेटिएको छ..घरमा बसेका घरबेटी डराउँदै मिडियामा’ भनेर लेखिएको छ ।

यो सामग्री तयार पार्दासम्म उक्त भिडिओ पोस्टमा ८१५ रियाक्सन, ६४ कमेन्ट, दुई लाख २६ हजार बढी भ्युज आएको छ भने ५६० शेयर भएको छ । ओरिजिनल लिङ्क र आर्काइभ लिङ्क । 

अनुसन्धान

टेकपाना फ्याक्टचेक डेस्कले सामाजिक सञ्जालमा भाइरल भएको यो दाबीको सत्यता पत्ता लगाउन अनुसन्धान थाल्यो । सबैभन्दा पहिले भिडिओ कसरी फैलिरहेको छ भन्ने बुझ्न कहाँकहाँ शेयर भइरहेको छ भन्ने खोज्यौं । यसका लागि सम्भावित कीवर्डहरू ‘बालेन बम’, ‘बालेनको घरमा बम’, ‘बालेन शाहको घरमा बम’, ‘बालेनको घरमा बम’ लगायत राखी अंग्रेजी र नेपाली दुवै तरिकाबाट फेसबुक र गुगलमा सर्च गर्यौं । 

यसअन्तर्गत सबैभन्दा पहिले ६.६ हजार फलोअर भएको ‘मेरो देश नेपाल’ नामक पेजले  “बालेन को घरमा बम भेटिएको छ” भन्दै  वैशाख २३ गते बिहान १०:४४ बजे उक्त भिडिओ राखेको पाइयो । 

सोही दिन दिउँसो २६ हजार फलोअर ‘निरन्तर यात्रा क्रान्तिको’ नामको फेसबुक आईडीबाट ‘बालेन बसेको घरमा बम फेला पर्‍यो भन्ने कुरा आछ त !’ भन्दै ‘मेरो देश नेपाल’ पेजले अपलोड गरेकै भिडिओ राख्यो । यो सामग्री तयार पार्दासम्म उक्त पोस्टमा ११ सय रियाक्सन, ९५ कमेन्ट, ८७ हजार भ्युज तथा २९७ शेयर आएको छ । हेर्नुहोस् ओरिजिनल लिङ्क र आर्काइभ लिङ्क ।

त्यस्तै ७६ हजार फलोअर भएको ‘Ganesh Urmila Bohara’ नामको फेसबुक पेजबाट ‘बालेनको घरमा बम भेटियो 😥😭 Balen’ भन्दै सोही भिडिओ शेयर भएको देखिन्छ । यो सामग्री तयार पार्दासम्म उक्त पोस्टमा ३१० रियाक्सन, ९ कमेन्ट र ५३ शेयर आएको देखिन्छ । हेर्नुहोस् ओरिजिनल लिङ्क र आर्काइभ लिङ्क ।  

भिडिओ पोस्टमा कमेन्ट गर्ने अधिकांश प्रयोगकर्ताले पनि बालेनको घरमा बम भेटिएको दाबीलाई पत्याउँदै आफ्ना कुरा लेखेका छन् । 

Ganesh Urmila Bohara, ‘निरन्तर यात्रा क्रान्तिको’,  ‘मेरो देश नेपाल’ नामका फेसबुक पेज एउटै भिडिओ पोस्ट गरेको पाइयो । सबै भिडिओ एउटै भएको र त्यसमा तल दायाँपट्टि ‘विज्ञापनका लागि जीवन पाण्डे’ भन्दै फोन नम्बर राखिएको थियो । भिडिओ भेरिफिकेसनका अन्य फ्याक्टचेक टुल प्रयोग गर्नुपूर्व उक्त नम्बरमा कल गर्ने निधोसहित जीवन पाण्डेलाई फोन गर्दा उनले आजभन्दा करिब दुई वर्ष पहिलेको अर्कै प्रसङ्गको भएको भिडिओमा अपलोड गरेको जानकारी दिए । साथै उनले उक्त भिडिओको ओरिजिनल लिङ्क पनि उपलब्ध गराए ।

अनुसन्धान गर्ने क्रममा हामीले यो भिडिओ २०७९ साउन ४ गते (Jul 19, 2023) मा ‘देश दुनियाँ खबर’ नामक युट्युब च्यानलमा ‘बोम राखेको घरका घरबेटी डराउदै मिडियामा। भन्छन झन्डै घर उड्यो। Kathmandu Sinamangal Bomb News’ शीर्षकमा ८ मिनेट ४ सेकेन्डको भिडिओ अपलोड भएको पायौं । अहिले भाइरल भइरहेको भिडिओ त्यही पुरानो भिडिओको सुरुवाती ५८ सेकेन्डको अंश रहेको पत्ता लाग्यो । जसलाई अहिले गलत र सनसनीपूर्ण क्याप्सन दिएर फैलाइएको छ । हेर्नुहोस् उक्त भिडिओकाे सुरुवाती ५८ सेकेन्डको भिडिओ ।

दाबी

काठमाडौं महानगरपालिकाका मेयर बालेन्द्र शाह (बालेन) को निवासमा बम भेटियो ।

दाबीकर्ता

‘मेरो देश नेपाल’, ‘निरन्तर यात्रा क्रान्तिको’, ‘Ganesh Urmila Bohara’ लगायतका फेसबुक पेज

तथ्य

काठमाडौं महानगरपालिकाका मेयर बालेन्द्र शाह (बालेन) को निवासमा बम भेटिएको भन्दै अहिले प्रचार भइरहेको भिडिओ करिब दुई वर्ष पुरानो हो । साथै, यो भिडिओ कुनै पनि रूपमा सम्बन्धित छैन । 

निष्कर्ष

‘मेरो देश नेपाल’, ‘निरन्तर यात्रा क्रान्तिको’, ‘Ganesh Urmila Bohara’ लगायतका फेसबुक पेजले मङ्गलबार (वैशाख २३) देखि काठमाडौं महानगरका मेयर बालेन्द्र शाह (बालेन) को निवासमा बम भेटिएको भन्दै भाइरल गराइरहेको भिडिओ गलत र भ्रामक हो । बालेनको घरमा बम भेटिएको दाबी गर्दै पोस्ट भएको भिडिओ २०७९ साउन ४ गते (Jul 19, 2023) मा ‘देश दुनियाँ खबर’ नामक युट्युब च्यानलमा ‘बोम राखेको घरका घरबेटी डराउदै मिडियामा। भन्छन झन्डै घर उड्यो’ शीर्षकको भिडिओको सुरुवाती ५८ सेकेन्डको अंश हो । यसर्थ सामाजिक सञ्जाल प्रयोगकर्तालाई भ्रम छर्ने नियतले पुरानो र असम्बन्धित भिडिओको क्लिप काटेर अहिले भाइरल गराइएको हो । 

प्रतिक्रिया

तपाईंले हाम्रो वेबसाइट, सामाजिक सञ्जालका ह्यान्डल (फेसबुक, इन्स्टाग्राम, टिकटक, एक्स, युट्युब, लिङ्क्डइन) वा [email protected] मा तथ्य जाँच गर्नुपर्ने सामाजिक सञ्जालका पोस्ट पठाउन सक्नु हुनेछ । तथ्य जाँचलाई लिएर कुनै प्रतिक्रिया वा सुझाव भए हामीलाई ईमेल पठाउनु होला ।

पछिल्लो अध्यावधिक: बैशाख २४, २०८२ १९:२५

काभ्रेपलाञ्चोक– वैशाख २२ गतेदेखि काभ्रेको धुलिखेल नगरपालिका–१२ स्थित शंखुमा बस्दै आएका ११ परिवारका ४४ जना रोहिंगा शरणार्थीलाई बुधबार स्थानीय प्रशासनले फिर्ता पठाएको छ ।

कपनबाट अस्थायी रूपमा बसोबास गर्न धुलिखेल आएका म्यानमारका रोहिंगा शरणार्थीलाई काठमाडौं फिर्ता पठाइएको जिल्ला प्रहरी कार्यालय काभ्रेका डीएसपी मिनबहादुर घलेले जानकारी दिए ।

शरणार्थीहरू शंखुमा खाली स्थानमा भाडामा बस्ने गरी आएका थिए । वडा अध्यक्ष मोहनप्रसाद लामिछाने सहित प्रहरी, जनप्रतिनिधि र स्थानीयले छलफल गरेर उनीहरूलाई फिर्ता पठाएका हुन् । 

११ परिवारका बच्चा सहित ४४ जना रोहिंगालाई फिर्ता गरिएको प्रहरीले जानकारी दिएको छ । ४९ जना शरणार्थीमध्ये ३ जना धुलिखेल अस्पतालमा छन् । एक जना शरणार्थी सुत्केरी रहेकाले उनको परिवार अस्पतालमा छन् । १ जना भने अध्ययनका लागि ललितपुर गएका थिए ।

प्रहरीका अनुसार केही समय पहिले वाल लगाउने कामको लागि बूढानीलकण्ठ नगरपालिका–११ कपनस्थित लसुनटार र राममन्दिर क्षेत्रमा रहेको टोलबाट काभ्रे आएका थिए ।

यस अघि रोहिंगा समुदायले पनौती नगरपालिका—३ कुशादेवीमा टहरा बनाएका थिए । केहीदिनमा नै स्थानीयले अवरोध गरे पछि उनीहरू ठाउँ छाडेर हिँडेका थिए ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

रामेछाप । नेपाली कांग्रेसका नेता कृष्णप्रसाद सिटौलाले वर्तमान सरकार परिवर्तनको कुनै सम्भावना नरहेको बताएका छन्।

नेपाली कांग्रेस रामेछापको दोस्रो नगर सम्मेलन उद्घाटन कार्यक्रमलाई बुधबार रामेछापमा सम्बोधन गर्दै सिटौलाले बाहिर हल्ला भए जस्तो सरकार परिवर्तनको कुनै सम्भावना नरहेको बताए। ‘बाहिर आएको हल्ला जस्तो सरकार परिवर्तनको कुरामा कांग्रेसको ध्यान गएको छैन, हाम्रो तर्फबाट गठबन्धनमा कुनै धोका हुँदैन’, उनले भने।

दुईवटा पार्टीको सरकार भएको कारण सानातिना कुरामा कहिले काहीँ समस्या हुने कुरा भने सामान्य भएको सिटौलाले बताए। ‘दुईवटा पार्टीको सरकार रहेकाले अलि अलि समस्या त हुन्छ नै, त्यसलाई शीर्ष नेताहरू बसेर मिलाउँदै जानुहुन्छ, मिल्छ’, उनले भने।

माओवादी केन्द्रका अध्यक्ष प्रचण्डले पटक पटक धोका दिएको कारण कांग्रेस र एमालेको सरकार बनेको उनले स्पष्ट पारे। त्यसैले कांग्रेसका कारण अहिलेको गठबन्धन सरकारमा कुनै समस्या नहुने सिटौलाले बताए। ‘हामी सानोतिनो समस्याबाट अहिलेको सत्ता गठबन्धनबाट भाग्नेवाला छैनौँ’, सिटौलाले भने ।

सिटौलाले कांग्रेस देशको प्रमुख राजनीतिक शक्ति मात्र नभएर परिवर्तनको संवाहक समेत भएको बताए। त्यसैले कांग्रेस कार्यकर्ता बजारमा चल्ने हल्लाको पछि लाग्नु नहुने उनको धारणा छ।

सिटौलाले पार्टी सदस्यताको नवीकरण र वितरणको लागि पार्टीमा सामूहिक प्रयास हुनुपर्नेमा जोड दिए। पदमा रहेकाले मात्र सदस्यता वितरण गर्ने भन्दा पनि सामूहिक प्रयासबाट सो काम हुनु पर्ने उनको धारणा छ।

सिटौलाले यतिबाट कांग्रेस पार्टी एकताबद्ध भएर अघि बढ्नु पर्ने बताए। ‘हाम्रो एकताले नै अरूलाई पनि राष्ट्रिय एकतामा ल्याउन सकिन्छ, अब शैलीका साथ पार्टीको संगठनमा जुट्नु पर्ने बेला भएको छ’, उनले भने।

२०४६ को परिवर्तन पछि मुलुकमा धेरै कुरामा विकास भएको बताउँदै सिटौलाले केही भएको छैन भन्ने कुरा स्वीकार गर्न नसकिने बताए। यस बिचमा पूर्वाधार निर्माणमा देशले उल्लेख्य प्रगति गरेको उनले सुनाए।

नेपाली कांग्रेस रामेछाप नगर समितिका सभापति कमलविक्रम कार्कीको अध्यक्षतामा भएको कार्यक्रममा नेपाली कांग्रेसका केन्द्रीय सदस्य शिवप्रसाद हुमागाईं, कार्यवाहक जिल्ला सभापति लेखबहादुर कार्की, निवर्तमान जिल्ला सभापति लबश्री न्यौपाने, महासमिति सदस्य रत्न कार्की, जिल्ला सचिव दीपक खड्का, प्रवक्ता कुमार श्रेष्ठ, प्रदेश सभापति राजेश श्रेष्ठ, रामेछाप नगरपालिकाकी उप प्रमुख बालकुमारी कार्की लगायतले समसामयिक राजनीतिक विषयमा धारणा राखेका थिए।

काठमाडौँ । नेपाल अटोमोबाइल इम्पोर्टर्स एन्ड म्यानुफ्याक्चर्स एसोसिएसन (नाइमा)ले ‘नेपाल मोबिलिटी एक्स्पो २०२५’ आयोजना गर्ने भएको छ । बुधबार एक विज्ञप्ति जारी गर्दै नाइमाले आउँदो २१ साउनदेखि २५ साउनसम्म काठमाडौँको भृकुटीमण्डपमा उक्त प्रदर्शनी हुने जानकारी दियो ।

प्रदर्शनीका लागि २९ वैशाखसम्म स्टल बुकिङ गर्न सकिनेछ । स्टलको अन्तिम बाँडफाँट लट्री प्रणालीमार्फत गरिने नाइमाले जनाएको छ ।

दुई र चार पाङ्ग्रे तथा हलुका व्यावसायिक सवारी साधनको लागि छुट्टाछुट्टै हल नराखी प्रदर्शकले आफ्नो आवश्यकताअनुसार कुनै पनि स्टल रोज्न सक्ने व्यवस्था मिलाइएको छ ।

आयोजकका अनुसार यस प्रदर्शनीले अटोमोबाइल क्षेत्रका निर्माता, डिलर, वितरक, उपभोक्ता, अवलोकनकर्ता र सरोकारवालाहरूलाई एकै ठाउँमा ल्याउने छ । साथै, अटो क्षेत्रमा भइरहने परिवर्तनबारे नीतिनिर्माता, विज्ञ र उद्योगीहरूलाई एउटै मञ्चमा ल्याएर अटोमोटिभ प्रविधि, डिजाइन र दिगोपनसम्बन्धी नवीनतम प्रविधिको प्रदर्शन गरिने नाइमाले उल्लेख गरेको छ ।

नाइमाकी संस्थापक अध्यक्ष रितु सिंह वैद्यका अनुसार प्रदर्शनीको मुख्य आकर्षणमा विद्युतीय सवारी हुनेछ । नेपाल मोबिलिटी एक्स्पो २०२५ ले नेपालको अटोमोबिल क्षेत्रको भविष्यलाई गति दिने र अटोमोटिभ उद्योगलाई अघि बढाउने सहकार्यलाई प्रवर्द्धन गर्ने उनको विश्वास छ ।

पछिल्लो अध्यावधिक: बैशाख २४, २०८२ १६:३

काठमाडौं– नक्सालस्थित नेपाल बाल मन्दिर जग्गा लिज प्रकरणमा १७ जनाविरुद्ध मुद्दा दर्ता भएको छ । जिल्ला सरकारी वकिलको कार्यालय, काठमाडौंले बुधबार जिल्ला अदालतमा मुद्दा दायर गरेको हो ।

रिता सिंह वैद्य नेपाल बाल संगठनको अध्यक्ष भएको बेला बाल संगठनको जग्गा लिजमा दिने निर्णय भएको थियो । उनीसहित १७ जनाविरुद्ध बुधबार मुद्दा दर्ता भएको हो ।

मुद्दा दर्ता गर्दै ६० करोड बढी रकम मागदाबी गरिएको छ । बाल मन्दिरको जग्गा लिजमा दिने निर्णयमाथि अनुसन्धानपछि प्रहरीले फाइल पेश गरेको थियो भने जिल्ला सरकारी वकिलको कार्यालयले मुद्दा चलाउन नपर्ने सिफारिस गरेको थियो ।

सिंह उपप्रधानमन्त्री एवं शहरी विकासमन्त्री प्रकाशमान सिंहकी दिदी हुन् ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौँ । पाकिस्तानले भारतीय हवाई हमलाको जवाफी कारबाहीमा आफ्नो सेनाले भारतका पाँच लडाकु विमान र एउटा ड्रोन खसालेको दाबी गरेको छ । पाकिस्तानी सुरक्षा स्रोतलाई उद्धृत गर्दै अन्तर्राष्ट्रिय समाचार संस्था सीएनएनले खसालिएका विमानमध्ये तीन ओटा फ्रान्सबाट खरिद गरिएका राफेल जेट रहेको लेखेको छ ।

सीएनएनका अनुसार पाकिस्तानी स्रोतले भारतले केही वर्षअघि फ्रान्सबाट किनेको बहुमूल्य सैन्य सम्पत्तिमध्येका तीन ओटा राफेल जेट खसालेको दाबी गरेको छ । यद्यपि पाकिस्तानले विमान कहाँ र कसरी खसालिएको हो भन्नेबारे विस्तृत जानकारी दिएको छैन ।

भारतले भने अहिलेसम्म आफ्नो कुनै पनि विमान हराएको वा खसालिएको पुष्टि गरेको छैन ।

यसैबिच भारत प्रशासित कश्मीरको वुयान गाउँमा एक अज्ञात विमान दुर्घटनाग्रस्त भएको एक प्रत्यक्षदर्शी र स्थानीय सरकारी अधिकारीले बताएका छन् । समाचार एजेन्सी एएफपीले सार्वजनिक गरेको तस्बिरमा खेतमा विमानको भग्नावशेष देख्न सकिन्छ । तर विमान कसको हो भन्ने स्पष्ट भइसकेको छैन ।

त्यस्तै न्युज अजरबैजानले पाकिस्तानले भारतको एक ड्रोन कोल्टी क्षेत्रमा खसालेको उल्लेख गरेको छ ।

यस घटनाक्रमका बिच पाकिस्तानी प्रधानमन्त्री शहबाज शरीफले बुधबार भारतको पछिल्लो कारबाहीलाई ‘युद्धउन्मुख कार्य’को संज्ञा दिँदै आफ्नो देशलाई जवाफ दिने ‘पूर्ण अधिकार’ रहेको बताएका छन् ।

२२ अप्रिलमा पहलगाममा भएको आतंककारी हमलाको १५ दिनपछि ‘अपरेसन सिन्दुर’ अभियान अन्तर्गत बुधबार दिउँसो भारतले यो हमला गरेको हो । 

पाकिस्तानी सञ्चारमाध्यमका अनुसार बहावलपुरमा भएको हवाई हमलामा कम्तीमा ३० जनाको मृत्यु भएको छ । समाचार एजेन्सी एएनआईले लश्कर-ए-तैयबा र जैश-ए-मोहम्मद जस्ता आतङ्कवादी समूहका मुख्यालय पूर्ण रूपमा ध्वस्त भएको जनाएको छ ।

पछिल्लो अध्यावधिक: बैशाख २४, २०८२ १६:५९

काठमाडौं– म्यानमारको मेवाडीमा बाध्यकारी श्रममा फसेका ११ जना नेपालीको उद्धार भएको छ । जसमा एक जना महिला र १० जना पुरुष छन् । उनीहरूलाई दलालमार्फत अनलाइन स्क्यामिङमा लगाइएको थियो ।

बैंककस्थित नेपाली दूतावासले थाइल्यान्ड सरकारको सहयोगमा उनीहरूलाई उद्धार गरिएको हो । उनीहरूलाई टाक इमिग्रेसन अफिस मेसोट हुँदै थाइल्यान्ड ल्याइएको थियो । उनीहरूलाई वैशाख २४ गते नेपाल फर्काइएको दूतावासले जनाएको छ ।

‘नेपाल सरकारले तोकेका मापदण्डबमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो, धेरै पैसा कमाउने हेतु कम्बोडिया लाओस, म्यानमार र थाइल्यान्डलगायत वैदेशिक रोजगारीमा नआउनका लागि राजदूतावास सम्बन्धित सबैमा पुनः अनुरोध गर्दछ,’ दूतावासद्वारा जारी विज्ञप्तिमा भनिएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।