दार्चुला । दार्चुलाको उत्तरी सिमानामास्थित टिंकर गाउँका स्थानीय छ महिनापछि गाउँ फर्किएका छन्। गत मङ्सिरमा चिसो छल्न गाउँ छोडेर खलङ्गा झरेका ७० परिवार पुनःगाउँ फर्किएका हुन्।

गत मङ्सिरमा कठोर जाडो छल्न गाउँ छाडेका यहाँका स्थानीय वैशाख अन्तिम साता मात्रै पुनःफर्किएका छन्। ‘छ महिनापछि फर्कंदा आफ्नो घरको ढोका देवी–देवता भरोसामा जस्तोको तस्तै रहेछ’, स्थानीय जसपाल तिंकरीले भने, ‘भगवान् भरोसा छोडिएका घरका ताला खुलेका छन्।” छ दिनको यात्रापछि अहिले सबै स्थानीय गाउँपुगेपछि चहलपहल बढेको छ।

टिंकर पुग्न नेपालकै भूमि भएर जान सकिने गोरेटो बाटो छैन। स्थानीय भारतको बाटो हुँदै कठिन यात्रा गरी गाउँ पुगेका छन्। वडा नम्बर १ का वडा सदस्य एवं टिंकरका स्थानीय हितेश बुढाथोकीले भने, ‘आफ्नै भूमि भएर गाउँ फर्किन नपाउँदा नरमाइलो लाग्छ।’ आफ्नो गाउँ जान भारतीय अनुमति लिनुपर्दा अपमानित महसुस हुने गरेको स्थानीयको गुनासो छ। राज्यले समयमै पूर्वाधार निर्माणमा ढिलाइ गर्दा यहाँका नागरिकले सास्ती खेप्नुपरेको हो।

सरकारले विशेष अनुदानअन्तर्गत चालू आर्थिक वर्षमा रु पाँच करोड ५० लाख बजेट पठाएको भए पनि गाउँपालिकाले ठेक्कामा ढिलाइ हुँदा बाटो बन्न सकेन। यद्यपी गाउँपालिकाले यसै साता मात्र निर्माण कम्पनी छनोट गरेको छ।

यो पटक आफ्नै भूमि भएर गाउँ जाने सपना बुनेका व्यासीहरू अन्ततः भारतकै भूमि भएर गाउँ फर्किनुपरेको बुढाथोकी बताउँछन्। उनी भन्छन्,‘कहिलेकाही आफ्नै सरकारप्रति हिनताबोध हुन्छ।’ विसं २०७७ जेठ ७ गते सरकारले चुच्चे नक्सा जारी गर्दा स्थानीय निकै खुसी थिए। “भूगोल नआए पनि नक्सामा हाम्रो भन्ने अधिकार पाएको महसुस गर्‍यौँ’, जसमल बुढाथोकीले सुनाए, ‘तर नक्सा पाएका नागरिकको लागि पैदलबाटो बनाउन सरकारले यतिका वर्ष लगाउँदैछ। सडक सपना त अझै धेरै टाढाको छ।”

नक्साजारी भएपछि एकपटक सरकारले हेलिकप्टरमार्फत खाद्यान्न ढुवानी गर्‍यो। नागरिकमा एक प्रकारको खुसी महसुस छायो। तर विस्तारै ती सबै सपना जस्तै लाग्न थालेको स्थानीय दानसिंह तिंकरीको बुझाइ छ। उती बेला राज्यका माथिल्लो निकायबाट भएको भ्रमण हेर्दा व्याससम्म सडक चाडै पुग्ने विश्वास थियो।

यहाँका बासिन्दा वर्षको आधा समय खलङ्गामा र बाँकी समय टिंकरमा बस्ने गर्छन्। उनीहरूको भाषामा यसलाई ‘कुञ्चा’ सर्नु भनिन्छ। कुञ्चा भनेको सौका समुदायको भाषामा बसाइसराइ हो। तीन हजार तीन सय मिटर उचाइमा अवस्थित यस गाउँमा ६ फिटभन्दा बढी हिउँ पर्ने हुँदा हिउँदमा बस्न सकिँदैन दानसिंह भन्छन्। चिसो छल्न उनीहरू परिवार, पशुचौपाया, खाद्यान्नसहित खलङ्गातिर सर्छन्।

चिसो मौसम भएका कारण छ महिनागाउँ सुनसान हुन्छ। घरका ढोकामा चाबी लगाइएको हुन्छ। दानसिंहले थपे, ‘अहिलेसम्म गाउँमा चोरी भएको घटना छैन। यो सबै भगवान्को देन हो।’ हामीहरूको संस्कृति, परम्परा र पूजापाठमा गहिरो आस्था छ। यही कारण कोही नहुँदा पनि हाम्रो खाद्यान्न, घर सुरक्षित नै रहेको हुन्छ।

स्थानीयको मुख्य जीविकोपार्जन कृषि, व्यापार र जडिबुटी सङ्कलन हो। यहाँ फापर, उवा, काकनु, आलु गहुँजस्ता अन्नबाली उत्पादन हुन्छ। उनीहरू गाई, चौरी, खच्चड, घोडा, बाख्रा पाल्छन्। अहिले गाउँपुगेपछि स्थानीय आलु फापर, गहुँ, छर्ने तयारीमा छन्।

चीनसँगको व्यापार खुला हुँदा तिब्बतसँग किनमेल गर्थे। पछिल्लो समय भने चीनबाट खाद्यान्न आउन रोकिएको छ। नेपालमा मात्रै बसोबास गर्ने व्यासी सौका समुदायको मात्रै यहाँ बसोबास हुन्छ।

परम्परागत घरले सुन्दरता दिएको छ। टिंकर प्राकृतिक रूपमा अत्यन्त सुन्दर छ। फुलेका मनमोहक फूल, घर नजिकै देखिने नाउर जस्ता वन्यजन्तु, अपि हिमाललगायत हिमशृङ्खला, सुदूरहिमाली जीवनशैलीले यहाँलाई विशेष बनाउँछ। सौका समुदायले आफ्नै भाषा ‘रङ्ग’ बोल्छन्।

छैन आधारभूत सेवा

व्याँस गाउँपालिका–१ कातिंकरबासीहरू वर्षको करिब ६ महिना गाउँमा बसोबास गर्छन्। सो अवधिमा स्वास्थ्य चौकी नहुँदा उनीहरू सामान्य रोग लाग्दा पनि भारतीय सुरक्षाकर्मी समक्ष धाउनुपर्छ या आफैँले खलङ्गाबाट बोकेर लिएको औषधि प्रयोग गर्न बाध्य छन्।

“सामान्य टाउको दुख्दा औषधि हुँदैन, स्थानीय जसमल बुढाथोकी भने, ‘ज्येष्ठ नागरिक बिरामी हुँदा अकालमै ज्यान गुमाउनुको विकल्प छैन।’ धेरैले सिटामोल, दमलगायत औषधि खलङ्गाबाटै आफूसँगै बोकेर लिने गर्छन्। उनीहरूको भाषामा आफ्नै स्वास्थ्यकर्मी आफैँ बिरामी जस्तै हो।

व्यास १ को छाङ्गरूमा स्वास्थ्य चौकी छ। तर तिंकर गाउँबाट छांगरू आउजाउ गर्न पाँच घण्टा बढी समय लाग्छ। गाउँमा युवा कमै बस्छन्। विरामी हुँदा बोक्न पनि मुस्किल पर्छ। पढाई र रोजगारीको सिलसिलामा गाउँभन्दा बाहिर युवा हुँदा गाउँमा कुनै अप्ठ्यारो पर्दा समस्या हुने गर्छ। “पहिले त कोही बिरामी हुँदा चार पाँच दिनपछि खबर पाउने अवस्था थियो’, बुढाथोकीले भने, ‘गतवर्षदेखि ल्याण्डलाइन र नेपाल टेलिकमको टु जीफोन सञ्चालन भएपछि सहज भएको छ।’

चिसोका कारण बिरामी पर्ने जोखिम उच्च छ, तर यस क्षेत्रमा राज्यको ध्यान कम गएको देखिन्छ। सर्वसाधारण मात्र होइन यहाँका सुरक्षाकर्मीले बोेकरै औषधि लिनुपर्छ। वडा सचिव विनोदसिंह बुढाथोकीका अनुसार तिंकरमा तीन–चार वर्षअघि निर्माण थालिएको स्वास्थ्य भवन अझै पूरा हुन सकेको छैन। उनले भने, ‘समयमै बजेट नआउँदा स्वास्थ्य संस्था सञ्चालनमा आउन सकेको छैन ’

पञ्चायतकालमा नेपाली बाटो, अहिले विदेशको भर

पञ्चायतकालमा टिंकर पुग्न नेपाली गोरेटो बाटो प्रयोग हुन्थ्यो। बहुदल आएपछि त्यो बाटो बन्द भयो। गोरेटो बाटो मर्मतमा ध्यान नजाँदा स्थानीयले जहिल्यै आफ्नै गाउँ फर्किन भारतीय भूमि र भारतीय अनुमतिको भर पर्नुपरेको छ।

व्याँस गाउँपालिका अध्यक्ष मङ्गलसिंह धामी भन्छन्, ‘व्यास गाउँपालिका–१ को छाङ्गरू टिंकर जोड्ने गरी पटकपटक बजेट नगएको भने होइन। तर नियमन निकायको अभाव भयो। बजेटको सही प्रयोग हुन नसक्दा यो बाटो कहिल्यै बनेन्। तत्कालीन जिल्ला विकास समिति, गाउँविकास समितिमार्फत बजेट राख्यो। विसं २०७४ मा स्थानीय सरकार बनेपछि गाउँपालिकाले लगानी ग¥यो। गतवर्ष बाटो मर्मत सम्भारमा करोड खर्च भयो। तर बाटोको अवस्था उस्ताको उस्तै छ।

विगतमा केही ठाउँमा भारतीय सडक निर्माणको क्रममा नेपालतिरको बाटो अवरूद्ध भएको स्थानीयवासी बताउँछन्। ठाउँठाउँमा भारतले महाकाली नदी किनारैकिनार सडक लाँदा ड्याम बाधिएर नेपालतर्फको बाटो क्षति हुन पुगेको छ। केही ठाउँमा पहिरो गएपछि बाटो अवरुद्ध भएको छ। तम्बाकुलगायत क्षेत्रमा नेपालतिर नदीले पूरै कटान गरेपछि पूर्णरूपमा बाटो बन्दभएको वडाध्यक्ष योगेश बोहरा बताए।

नेपालतिर बाटो नबनेकै कारण व्यासका नागरिक मात्र होइन, व्यासमा कार्यरत सशस्त्र प्रहरी बल नेपाल नम्बर ५० गुल्म, इलाका प्रहरी कार्यालय छाङ्गरू, बिओपी तिंकर तथा सीमा चौकी तिंकरी प्रहरीलगायतले भारतकै बाटोको भर पर्नुपरेको छ।

टिंकरमा प्रहरी र सशस्त्रको छ महिना मात्रै

दार्चुलाको टिंकर क्षेत्रमा प्रहरी र सशस्त्र प्रहरीको बसाइ अधिकतम छ महिनासम्म मात्र हुने गरेको छ। चिसो मौसमका कारण सुरक्षाकर्मीहरू स्थानीय जस्तै बसाइ सर्नुपर्ने अवस्था आइपरेको हो।

स्थानीयको कुञ्चागाउँ पुग्ने बेला सशस्त्र प्रहरी टिंकर उक्लिएको सशस्त्र प्रहरी बल नेपाल नम्बर ५० गुल्मका गुल्मपति डिएसपी लीलीबहादुर चन्दले बताउनुभयो। अहिले सशस्त्र प्रहरी बल नेपाल ४४ गण हेडक्वाटर दार्चुलाबाट सशस्त्र प्रहरी निरीक्षक अनिल शाहीको नेतृत्वमा सशस्त्र प्रहरी टिंकरमा खटिएको हो। उनीहरू भारतीय बाटो हुँदै टिंकरको छायालेक बीओपी पुगेका हुन्।

दुई वर्षदेखि टिंकरको छायालेकमा सशस्त्र प्रहरी बस्न थालेको हो। व्यासकै छाङ्गरूमा गुल्म रहेको छ। चुच्चे नक्सा जारी भएसँगै यहाँ सुरक्षाकर्मी राखिएको हो। छाङ्गरूमा सशस्त्र प्रहरी र नेपाल प्रहरी वर्षभरि नै बस्ने गर्छन्।

नेपाल प्रहरी भने एक दुई दिनभित्र टिंकर उक्लिने तयारीमा रहेको जिल्ला प्रहरी कार्यालय दार्चुलाका सूचना अधिकारी एवं प्रहरी निरीक्षक छत्र रावतले बताए। अहिले नेपाल र भारत दुवैतर्फबाट अनुमति पत्र बनाउने काम भइरहेको उनको भनाइ छ।

– नरेन्द्रसिंह कार्की/रासस

काठमाडौँ । प्रधानमन्त्री केपी शर्मा ओलीको तस्बिर दुरुपयोग गरी अपमानजनक शब्दसहितको र्‍याप गीत बनाएर युट्युबमा अपलोड गरेको आरोपमा एक युवकविरुद्ध मुद्दा दायर भएको छ । भोजपुर घर भई ललितपुरको पुल्चोक बस्ने ३२ वर्षीय मलुम राईविरुद्ध काठमाडौं जिल्ला अदालतमा विद्युतीय कारोबार ऐन अन्तर्गत अभियोगपत्र दायर भएको हो ।

अभियोगपत्र अनुसार राईले ‘मलुम छोटेनली’ नामक युट्युब च्यानलमा प्रधानमन्त्री ओलीको तस्बिर राखी “KP CHOR- new rap song 2025….” शीर्षकमा र्‍याप भिडिओ अपलोड गरेका थिए । उक्त भिडिओमा प्रधानमन्त्री ओलीलाई होच्याउने शब्द प्रयोग गरी उनको मानमर्दन र सामाजिक सञ्जालमार्फत बदनाम गरेको अभियोग लगाइएको छ ।

प्रहरीले सामाजिक सञ्जाल अनुगमनका क्रममा उक्त भिडिओ फेला परेको थियो । त्यस क्रममा ‘मलुम छोटेनली (एवाहाङ्ग)’ नामक फेसबुक प्रोफाइलको टाइमलाइनमा राईको नाममा जारी सवारी चालक अनुमतिपत्रको फोटो भेटिएपछि युट्युब च्यानल प्रयोगकर्ताको पहिचान गरी अनुसन्धान अघि बढाइएको अभियोगपत्रमा उल्लेख छ ।

अभियुक्त राईले प्रहरी बयानमा देशको बिग्रँदो अवस्थाबाट आजित भएर प्रधानमन्त्री ओलीबारे त्यस्ता शब्द प्रयोग गरी ‘सुनो एआई एप’ मार्फत र्‍याप बनाएको स्वीकारेका छन् । उनले उक्त र्‍यापमा प्रधानमन्त्रीको सम्पादित तस्बिर राखेर भिडिओ बनाई आफ्नो युट्युब च्यानलमा अपलोड गरेको र यसमा अन्य कसैको संलग्नता नरहेको पनि बताएका छन् ।

प्रहरीले राईको साथबाट बरामद मोबाइलको प्राविधिक परीक्षण गर्दा उक्त युट्युब च्यानल र फेसबुक प्रोफाइल सोही मोबाइलबाट लग-इन भएको पाएको थियो । मोबाइलमा प्रधानमन्त्रीको फोटो प्रयोग गरी आपत्तिजनक शब्द बोलेको भिडिओ पनि फेला परेको प्राविधिक प्रतिवेदनमा जनाइएको छ ।

अभियोजन पक्षले राईले विद्युतीय सञ्चार माध्यमको दुरुपयोग गरी सार्वजनिक नैतिकता र शिष्टाचारविरुद्धका सामग्री प्रकाशन गरी प्रधानमन्त्रीको मानमर्दन गरेको उल्लेख गरेको छ । यसबाट युवकले विद्युतीय (इलेक्ट्रोनिक) कारोबार ऐन, २०६३ को दफा ४७(१) बमोजिम कसुर गरेको दाबी गरिएको छ । उक्त दफामा कसुर प्रमाणित भए एक लाख रुपैयाँसम्म जरिवाना वा पाँच वर्षसम्म कैद वा दुवै सजाय हुन सक्ने कानुनी व्यवस्था छ ।

पछिल्लो अध्यावधिक: बैशाख २७, २०८२ १०:१७

काठमाडौँ – चलचित्र ‘राजकुमारी’को औपचारिक निर्माण घोषणा गरिएको छ । चलचित्रको टाइटल सार्वजनिक गर्दै निर्माण टिमले करिब पाँच करोड अनुमानित लागतमा चलचित्र बनाउन लागेको जनाएको छ ।

चलचित्रको लेखन तथा निर्देशन रिम विश्वकर्माले गर्दै छन्। निर्देशक विश्वकर्माले यस चलचित्रलाई ‘ड्रिम प्रोजेक्ट’को रूपमा लिएको बताए । उनले भने, ‘मैले यसअघि पनि केही चलचित्र बनाएको थिएँ, तर यो प्रोजेक्ट मेरा लागि डेब्यु निर्देशनजस्तै हुनेछ । यसका पछाडि केही कारण छन्, त्यो म पछि खुलाउनेछु ।’

रेडलाइन्स फिल्म प्रालिको ब्यानरमा निर्माण हुने चलचित्रलाई पिबी थापाले एकल रूपमा लगानी गर्दै छन् । फिल्मको मुख्य पात्र राजकुमारीको भूमिकाका लागि अभिनेत्रीको छनोट प्रक्रिया जारी रहेको जनाइएको छ । अन्य कलाकार र प्राविधिक टोलीको चयन भने लगभग अन्तिम चरणमा पुगेको निर्माण पक्षले जनाएको छ ।

चलचित्रको अधिकांश छायांकन काठमाडौंमा हुनेछ भने अन्य केही दृश्य मुस्ताङ, पोखरालगायतका क्षेत्रमा पनि खिच्ने तयारी गरिएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काठमाडौं। संगीतकार तथा गायक राजनराज शिवाकोटी र गायिका मेलिना राईको स्वर रहेको नयाँ गीत ‘खोली तिरैमा’ सार्वजनिक भएको छ। गीतमा बेलायतमा बस्दै आएका गीतकार विनोद सुवेदीको शब्द छ।

गीतको भिडियोमा रमेश विश्वकर्मा र करिश्मा केसीले अभिनय गरेका छन्। यी दुवै कलाकारको यो पहिलो सहकार्य हो। रमेश यसअघि धेरै म्युजिक भिडियोमा अभिनय गरिसकेका छन् भने करिश्माको लागि यो डेब्यू भिडियो हो।

दोलालघाटमा छायांकन गरिएको भिडियोमा राजु बस्नेतको निर्देशन र सम्पादन छ । भिडियोमा आभेश बज्राचार्यको छायांकन, केबिका खत्रीको कोरियोग्राफी र कृष्णमान तामाङको कला निर्देशन छ ।

भिडियो विनोद सुवेदीको अफिसियल युट्युब च्यानल विनोद सुवेदीबाट सार्वजनिक गरिएको छ ।

काठमाडौँ । भारतीय दूरसञ्चार नियामक प्राधिकरण (टीआरएआई) ले स्टारलिंकजस्ता कम्पनीहरूले प्रदान गर्ने फिक्स्ड स्याटलाइट सेवाहरूले आफ्नो कुल आम्दानीको चार प्रतिशत स्पेक्ट्रम प्रयोग शुल्क तिर्नुपर्ने सिफारिस गरेको छ । यसका साथै सहरी क्षेत्रका प्रत्येक ग्राहकबाट वार्षिक ५०० भारु शुल्क लिन पनि सिफारिस गरिएको छ ।

यससँगै भारतमा एलन मस्क स्वामित्वको स्टारलिंक सेवा सुरु हुने बाटो खुलेको छ । तर टीआरएआईका अध्यक्ष अनिलकुमार लाहोटीले स्याटलाइट इन्टरनेटलाई मोबाइल वा फिक्स्ड लाइन सेवासँग प्रत्यक्ष प्रतिस्पर्धी मान्न नसकिने स्पष्ट पारेका छन् । “स्याटलाइट इन्टरनेट पूरक सेवा हो, प्रतिस्पर्धी होइन,” उनले भने ।

टीआरएआईका अनुसार स्याटलाइट सेवाको कुल ब्यान्डविथ सीमित हुने भएकाले त्यसलाई अन्य नेटवर्कका विकल्पको रूपमा हेर्न मिल्दैन । गत वर्षदेखि विचाराधीन रहेको यो सिफारिस दूरसञ्चार विभागले स्टारलिंकलाई आशय पत्र जारी गरेको दुई दिनपछि आएको हो ।

भारतीय बजारमा छिर्न खोजेको स्टारलिंकले अब टीआरएआईले सिफारिस गरेबमोजिम अब स्पेक्ट्रम प्राप्त गर्नुपर्नेछ । यसका लागि उसले प्रयोग गर्न चाहेको प्रति मेगाहर्ज स्पेक्ट्रमको लागि ३,५०० भारु शुल्क तिर्नुपर्नेछ । यदि स्टारलिंकले केही अन्य देशहरूमा जस्तै अधिकतम २०० मेगाहर्ज प्रयोग गर्छ भने वार्षिक ७० लाख भारु खर्च हुनेछ ।

सेवा सुरु गर्न कम्पनीले आठ प्रतिशत अधिकृत शुल्क पनि तिर्नुपर्नेछ, जुन भारतका मोबाइल र फिक्स्ड लाइन सेवामा पनि लाग्छ । तर यस्तो शुल्क संरचनाका कारण भारतमा स्टारलिंकको सेवा मूल्य भुटानमा भन्दा धेरै महँगो पर्ने प्रक्षेपण गरिएको छ ।

स्पेक्ट्रमको मान्य अवधि पाँच वर्षको हुने टीआरएआईको सिफारिसमा उल्लेख छ । जुन दुई वर्ष थप्न सकिनेछ । तर स्टारलिंकले न्यूनतम १५ वर्षको माग गरेको छ ।

सुरक्षासम्बन्धी सर्तहरू भने दूरसञ्चार विभागले छुट्टै व्यवस्था गरिरहेको छ, जसअनुसार भारतबाहिर स्याटलाइट इन्टरनेट टर्मिनल निष्क्रिय हुने व्यवस्था मिलाइने बताइएको छ ।

टीआरएआईको सिफारिसअनुसार अब दूरसञ्चार विभागले यी सर्तहरूको समीक्षा गरी आवश्यक परे पुनः सल्लाहका लागि टीआरएआईलाई फिर्ता पठाउनेछ । त्यसपछि मात्र भारत सरकारले स्याटलाइट इन्टरनेट सेवाको प्रशासनिक प्रक्रिया अगाडि बढाउने बताइएको छ ।

-द हिन्दुको सहयोगमा

पछिल्लो अध्यावधिक: बैशाख २७, २०८२ ८:५७

एजेन्सी – भारत–पाकिस्तान तनावका कारण भारतले ३२ विमानस्थलबाट नागरिक उडान बन्द गरेको छ । भारतीय सञ्चार माध्यमका अनुसार नागरिक उड्डयन मन्त्रालय (डीजीसीए)ले देशको उत्तरी र पश्चिमी भागमा अवस्थित विमानस्थल नागरिकहरुको लागि बन्द गरेको हो । 

भारतीय विमानस्थल प्राधिकरण र सम्बन्धित उड्डयन अधिकारीहरूलाई नोटम जारी गरिएको छ । नोटममा मे १५ बिहान साढे ५  बजेसम्म विमानस्थल बन्द रहने उल्लेख छ । उधमपुर, अम्बाला, अमृतसर, अवन्तिपुरा, भटिन्डा, भुज, बिकानेर, चंडीगढ, हलवारा, हिन्डन, जैसलमेर, जम्मू, जामनगर, जोधपुर विमानस्थल बन्द गरिएको छ । 

त्यस्तै, कान्डला, कांगडा (गग्गल), केशोद, किसनगढ, कुल्लु मनाली (भुन्तर), लेह, लुधियाना, लगायतका विमानस्थल सर्वसाधारणको लागि बन्द भएको छ । एयर इन्डियाले जम्मू, श्रीनगर, लेह, जोधपुर, अमृतसर, चण्डीगढ, भुज, जामनगर र राजकोटका उडानहरू मे १५ बिहान साढे ५ बजेसम्म रद्ध गरिएको उल्लेख गरेको छ । 

भारतले पाकिस्तान विरुद्ध अपरेशन सिन्दुरको नाममा आक्रमण गरेपछि दुवै देशहरु एक अर्का विरुद्ध कडा रुपमा उभिएका छन् । 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।