ललितपुर । जनता समाजवादी पार्टी, नेपालको जनवर्गीय संगठन ‘नेवाः राष्ट्रिय समितिको ऐतिहासिक प्रथम अधिवेशन’ शनिबार बिहानैदेखि भब्य रुपले सुरु भएको छ।

आज ललितपुरको गोदावरीमा आयोजित कार्यक्रमको प्रमुख वक्ता रहेका जसपा नेपालका अध्यक्ष उपेन्द्र यादवले अधिवेशनको उदघाटन गरेका छन्।

गोदावरी नगरपालिका–१४, स्थित ठैबको ता-फल्चाको प्राङ्गणमा बिहान ८ बजेदेखि नेवार समुदायको स्थानीय पहिरन र संस्कृति झल्किने गरि र्याली निकालिएको थियो।

जसपा नेपालका केन्द्रीय अध्यक्ष उपेन्द्र यादवको प्रमुख आतिथ्य र केन्द्रीय उपाध्यक्ष बिधुत बज्राचार्यको विशेष आतिथ्यतामा आयोजित कार्यक्रममा पार्टीका अन्य केन्द्रीय नेतृत्वसहित काठमाडौं उपत्यकाका स्थानीय नेवार समुदायको बाक्लो उपस्थिति रहेको छ।

काठमाडौं – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भिजिट भिसा प्रकरण र अग्नि सापकोटाबीच कुनै साइनो नभएको बताएका छन् । उनले भिजिट भिसा प्रकरणमा कांग्रेससँग अग्नि सापकोटासँगको मुद्दा साटेको आरोप गलत भएको समेत बताएका छन् ।

शनिबार बिहान विराटनगर विमानस्थलमा अध्यक्ष दाहालले संचारकर्मीसँग कुरा गर्दै यस्तो बताएका हुन् । भिसिज भिसा काण्ड र अग्नि सापकोटाको कुनै साइनो नभएको उनको जिकिर छ । उनले बाहिर वाइयात कुराहरु प्रचार गरेको भन्दै गुनासो गरे ।

उनले भने, ‘गृहमन्त्री रमेश लेखकले हिजो संसदमा केके बोल्नुभयो त्यसको जिम्मेवार उहाँ नै हो । हामीले भनेको के मात्रै हो भने छानविन हुनुपर्छ । यो विषय गम्भीर छ । एउटा अहिलेको गृहमन्त्रीसँग मात्रै पनि सम्बन्धित छैन । यो विषय धेरै पहिलेदेखिकै अत्यन्तै सम्वेदनशील विषयको रुपमा छ । त्यसकारण सुशासनको निम्ति यसको छानविन हुनुपर्छ । गहिरो अध्ययन हुनुपर्यो, संरचना बन्नुपर्यो त्यो कुरामा सहमति भएपछि हामीले अहिलेको आवश्यकता अनुसार देशको निम्ति सहज गरेका हौं । अग्नि सापकोटासँग मुद्दा साट्नुभएको भन्ने आरोप विल्कुल गलत कुरा हो । वाइयात कुराहरु मानिसहरुले प्रचार गर्ने गरेका छन् त्यस्तो केही पनि होइन । यो कुरा र अग्निको कुनै साइनो सम्बन्ध छैन ।’ 

उनले देश र जनताको बृहत्तर हितको निम्ति तत्काललाई दुई बुँदे सहमति गरेर संसद सुचारू हुने परस्थिति बनाइएको समेत बताएका छन् ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

काभ्रेपलाञ्चोक । काभ्रेपलाञ्चोकको मण्डनदेउपुर नगरपालिकास्थित चार क्रसर तथा इँटा उद्योग बन्द गरिएको छ। पटकपटक ताकेता गर्दा पनि कर तिर्न नटेरेपछि ती उद्योगमा ताला लगाइएको नगरले जनाएको छ।

नगरप्रमुख टोकबहादुर वाइबाको नेतृत्वमा स्थानीय जनप्रतिनिधि, स्थानीय उद्योग वाणिज्य सङ्घलगायत सम्मिलित अनुगमन टोलीले नगर कार्यालयमा दर्ता नभएका, कर नतिरेका र नवीकरण नभएका क्रसर उद्योग र इँटा उद्योगमा शुक्रबार ताला लगाएको हो।

उक्त टोलीले तीन वटा इँटा उद्योग र एउटा क्रसर उद्योगमा ताला लगाएको छ। नगरको वडा नम्बर ९ रायोबारीस्थित सेन्ट वासिङ एण्ड क्रसिङ उद्योगले आर्थिक वर्ष २०७८/०७९ देखि हालसम्म रु ४५ लाख ८४ हजार कर नतिरेपछि उद्योगमा ताला लगाइएको हो।

यस्तै कर नतिरेको वडा नम्बर ६ मा रहेका कालीदेवी र चण्डेनी–नगरकोट ब्रिक्स इण्डष्ट्रिज प्रालि तथा वडा नम्बर ७ मा रहेको दक्षिणकाली इँटा उद्योग इँटा उद्योगमा ताला लगाइएको छ।

कालीदेवीले ६१ लाख, ८४ हजार, दक्षिणकालीले ४५ लाख, ८४ हजार कर तिरेका थिएनन्। चण्डेनी–नगरकोट ब्रिक्स उद्योग भने दर्ता नभएकाले बन्द गरिएको हो।

नगरप्रमुख टोकबहादुर वाइबाले नगरको प्रावधानअनुसार पटकपटक कर तिर्न आग्रह गर्दा पनि नमानेपछि बाध्य भएर ताला लगाइएको बताए।

‘नगरले तोकेको मापदण्ड तथा कर तिरेपछि मात्रै ताला खोलिनेछ’, वाइबाले भने। उनका अनुसार ताला नखुलाउँदासम्म उद्योगबाट कुनै पनि सामग्री बेचबिखन नगर्न निर्देशन दिइएको छ। रासस

काठमाडौँ । १ माघ २०७९ मा पोखरामा भएको यति एयरलाइन्सको विमान दुर्घटनाको एक भाइरल भिडिओलाई हाल भारतीय सामाजिक सञ्जालमा एयर इन्डियाको दुर्घटना भन्दै भ्रामक रूपमा प्रचार गरिएको छ । सामाजिक सञ्जाल प्रयोगकर्ताले उक्त भिडिओ शेयर गर्दै गुजरातको अहमदाबादमा भएको विमान दुर्घटनाको फेसबुक लाइभ भिडिओ भएको दाबी गरिरहेका छन् । 

विमान दुर्घटना हुनुभन्दा ३० सेकेन्ड अघि भिडिओ एयर इन्डिया १७१ कल साइन भएको बोइङ ७८७-८ ड्रिमलाइनर विमानमा सवार यात्रुले खिचेको दाबी गरिएको छ । वास्तवमा यो दाबी पूर्णतया असत्य हो । सामाजिक सञ्जालमा फैलिएको उक्त भिडिओ १ माघ २०७९ मा पोखरामा भएको यति एयरलाइन्सको एटीआर-७२ विमान दुर्घटनाको हो । टेकपानाले दुर्घटनाको भोलिपल्ट् अर्थात २ माघ २०७९ मै उक्त भाइरल भिडिओको तथ्यजाँच गरेको थियो । 

उक्त भिडिओ विमानमा सवार भारतीय नागरिक सोनु जैसवालले फेसबुकमा लाइभ गरेका थिए, जसमा अवतरणको केही समयअघि विमान खस्नुअघिका अन्तिम क्षणहरू कैद भएका थिए । विमान जमिनको नजिक आइपुगेकाले मोबाइलमा इन्टरनेट चल्न सम्भव भएको र सोही कारण फेसबुक लाइभ हुन सकेको विज्ञहरूले बताएका थिए । उक्त दुःखद दुर्घटनामा चालक दलका सदस्यसहित कूल ७२ जना सवार थिए ।

यी भाइरल पोस्टलाई लिएर भारतीय सञ्चारमाध्यम तथा तथ्य-जाँच गर्ने निकायले समेत यो भिडिओ नेपालको विमान दुर्घटनाको भएको पुष्टि गरिसकेका छन् । भारतको पीटीआई, इन्डिया टुडे, सीएनबीसी टिभी १८ ले तथ्यजाँच सामग्री नै राखेका छन् । भारतमा भएको विमान दुर्घटनालाई लिएर सयौं भ्रामक तथा मिथ्या पोस्टहरू फैलिएका छन् ।

पछिल्लो अध्यावधिक: जेठ ३१, २०८२ ९:१३

खोटाङ – हलेसी तुवाचुङ नगरपालिकाले कक्षा–१२ को परीक्षा दिएर बसेका विद्यार्थीलाई कोदोको बिस्कुट उत्पादन, ‘ब्राण्डिङ’ र ‘प्याकेजिङ’ सम्बन्धी तालिम दिएको छ । नगरपालिकाको रैथाने बाली कोदोखेतीलाई प्रवर्द्धन गर्दै स्थानीय युवा पुस्तालाई आफ्नै ठाउँमा स्वरोजगार बनाउने उद्देश्यले कक्षा–१२ को परीक्षा दिएर बसेका विद्यार्थीलाई सहभागी गराएर नगरपालिकाले तालिम दिएको हो । 

‘कोदोको परिकार, स्वास्थ्यको सुरक्षा र आम्दानीको आधार’ भन्ने नारासहित वडा नं ७ महादेवस्थानस्थित वडा कार्यालयमा आयोजना गरिएको सात दिने तालिम शुक्रबार औपचारिकरुपमा समापन गरिएको छ । एकजना स्थानीय महिला उद्यमी तथा १२ जना विद्यार्थीको सहभागिता रहेको तालिममा सहभागी प्रशिक्षार्थीले उत्पादन गरेका कोदोको बिस्कुट, कुकिज, निम्की, पाउरोटी, मफिन र दुनोट प्याकेजिङ गरेर समापन कार्यक्रममा प्रदर्शन गरिएको थियो ।

तालिममा सहभागीले बनाएका कोदोका परिकार त्रिधार्मिकस्थल हलेसी बजारमा सञ्चालन गरिएको कोसेली घरमा राखेर बिक्री गर्ने र हलेसी आउने पाहुनालाई उपहारस्वरुप प्रदान गर्ने योजनाका साथ तालिमको आयोजना गरिएको हलेसी तुवाचुङ नगरपालिकाका–७ महादेवस्थानका वडाध्यक्ष कमल गिरीले जानकारी दिए ।

नगरपालिकाको कृषि शाखाद्वारा सञ्चालित तालिमको सहजीकरण काठमाडौँबाट झिकाइएको खाद्य प्राविधिक आर्जन गौतमले गरेका थिए । दक्ष प्राविधिको सहजीकरणमा कोदोको परिकार बनाउने तालिम निःशुलक लिन पाएपछि सहभागीहरू व्यावसायिक बन्न उत्साहित बनेको नगरपालिकाले जनाएको छ । 

रैथाने बाली ‘कोदो’को बजार सम्भावनालाई आत्मसात् गर्दै स्थानीय युवाका लागि सीपमूलक उद्यमशीलता प्रति आकर्षित गर्नका लागि तालिमको आयोजना गरिएको नगरप्रमुख विमला राईले बताइन् । 

तालिममा सहभागीलाई कोदोको परम्परागत प्रयोगलाई आधुनिक परिकारमा रूपान्तरण गर्दै गुणस्तरीय परिकार उत्पादन, ब्राण्डिङ, प्याकेजिङ तथा बजारीकरणका पक्षमा पनि व्यवहारिक जानकारी र अभ्यास गराइएको नगरपालिकाले जनाएको छ । 

जिल्लाको पश्चिमी क्षेत्रमा पर्ने यो नगरपालिकाले कोदोमा पाइने प्रोटिन, क्याल्सियम, आइरन तथा एन्टि–अक्सिडेन्टजस्ता पोषकतत्वहरूलाई ध्यानमा राखेर कोदो बालीलाई पोषण सुरक्षा र स्थानीय रोजगारीसँग जोड्ने प्रयास गरेको हो । 

तालिम समापन अवसरमा प्रशिक्षार्थीले उत्पादन गरेका सबै परिकारहरू कार्यक्रममा उपस्थित अतिथि तथा सहभागीहरूले अवलोकन गर्नुका साथै स्वाद परीक्षण गरेका छन् । तालिममा सहभागी विद्यार्थीले उत्पादन गरेका कोदोको विभिन्न प्रकारका परिकार गुणस्तरीय र स्वादिष्ट रहेको समापन कार्यक्रमका सहभागीले बताएका छन् । 

सुक्खाग्रस्त क्षेत्रमा पर्ने हलेसी तुवाचुङ नगरपालिकामा रैथाने बाली कोदो उत्पादन बढी हुने भएकाले पनि त्यसलाई प्रवर्द्धन गर्दै कोदोको विभिन्न प्रकारका परिकार उत्पादन गरेर बजारीकरण गर्न तालिमको आयोजना गरिएको जनाइएको छ । 

तालिमले विशेषगरी युवालाई सीपमार्फत सशक्त बनाउने, महिलालाई आम्दानीको अवसर दिने र रैथाने कृषि बाली उत्पादनको संरक्षण तथा सम्वर्द्धनमा उल्लेखनीय योगदान पुर्‍याउने अपेक्षा गरिएको नगरपालिकाले जनाएको छ ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

पोखरा। पोखरामा जारी श्री गण्डकी शतकुण्डीय गायत्री कोटिहोम विराट ज्ञान महायज्ञ आज समापन हुँदै छ। महायज्ञका प्रचार प्रसार संयोजक लेखराज ढकालका अनुसार कोटिहोम शनिबार औपचारिक समापन हुने बताएका हुन्।

शुक्रबार कोटिहोममा महाआरती गरिएको थियो। महाआरतीमा भक्तजनको उल्लेख्य सहभागिता रहेको थियो। कोटिहोममा हिजो देखि नै विभूति (भष्म), तिलक र प्रसाद वितरण गरिएको छ। विभूति, तिलक र प्रसाद लिन भक्तजनको भिड लागेको थियो।

शुक्रबारदेखि हवन कुण्डमा रहेका इट्टा वितरण गरिएको छ। उनका अनुसार १ सय रुपैयाँ तिरेर हवन कुण्डमा रहेका इट्टा पनि घरमा लान पाइने व्यवस्था रहेको छ। त्यसै गरी कोटिहोममा रहेका जल सहितको कलश पनि वितरण भइरहेको छ।

कोटिहोममा भएको राष्ट्रिय भजन प्रतियोगिताको पुरस्कार पनि हिजै वितरण गरिएको छ। प्रतियोगितामा देविस्थान भजन समूह पोखरा-२५ हेमजा प्रथम हुँदै ३ लाख ५५ हजार ५ सय ५५ रुपैयाँ प्राप्त गर्दा माछापुच्छे सेवा समाज पोखरा-२५ हेमजा द्वितीय हुँदै २ लाख ५५ हजार ५ सय ५५ रुपैयाँ प्राप्त गर्‍यो।

त्यस्तै बालन एवम् कला संस्कृति संरक्षण प्रतिष्ठान पोखरा–१७ तृतीय भएर १ लाख ५५ हजार ५ सय ५५ प्राप्त गर्दा राधाकृष्ण भजन समूह सैन मैना र भद्रकाली खैँजडी भजन समूह सान्त्वना हुँदै ६५-६५ हजार प्राप्त गरे।

त्यसै गरी धर्मोदय दश अवतार भजन समूह पाल्पा रामपुर उत्कृष्ट झाँकी, भक्ति मार्ग आध्यात्मिक कलाकार सङ्घ उत्कृष्ट अभिनय, मातृकेश्वर एकता भजन समूह पोखरा-२५ हेमजा उत्कृष्ट शब्द संयोजन, राष्ट्रिय लोक भजन चुड्का संरक्षण प्रतिष्ठान कालिका मन्दिर बागलुङ उत्कृष्ट नृत्य, हरिहर भजन समूह स्याङ्जा पुतली बजार उत्कृष्ट प्रस्तुति घोषित भएका थिए।

काठमाडौँ । साउदी अरबमा आगामी जुलाईदेखि आयोजना हुने ई-स्पोर्ट्स विश्वकप २०२५ का लागि विश्व प्रसिद्ध फुटबलर क्रिस्टियानो रोनाल्डो ग्लोबल एम्बासडर घोषित भएका छन् । उनले सामाजिक सञ्जालमार्फत सार्वजनिक रूपमा आफ्नो भूमिकाबारे जानकारी दिँदै ई-स्पोर्ट्सको विस्तार र भविष्यप्रति आफू उत्साहित भएको बताएका छन् ।

रोनाल्डोको ई-स्पोर्ट्समा प्रवेशलाई डिजिटल खेलकुद उद्योगको लागि महत्त्वपूर्ण मोडको रूपमा लिइएको छ । सामाजिक सञ्जालका विभिन्न प्लेटफर्ममा करोडौं फलोअर भएका रोनाल्डोको विश्वव्यापी प्रभावले ई-स्पोर्ट्स प्रतियोगिता विश्वभरका दर्शक, विज्ञापनदाता र लगानीकर्ताको ध्यान तान्ने आयोजकको अपेक्षा छ ।

ई-स्पोर्ट्स विश्वकप आउँदो ७ जुलाईदेखि २४ अगस्टसम्म रियादमा हुनेछ । लिग अफ लेजेन्ड्स, पब्जी, फेटल फ्युरी, भ्यालोरन्ट, चेस लगायत चर्चित खेल समावेश गरिएको प्रतियोगितामा सात करोड अमेरिकी डलर बराबरको पुरस्कार राशि तोकिएको छ । 

खेलकुदको परम्परागत संरचनाभित्रै डिजिटल प्रतिस्पर्धालाई स्थान दिलाउने उद्देश्यले रोनाल्डोजस्ता खेल हस्तीलाई एम्बासडर बनाइनु रणनीतिक कदम मानिएको छ । आयोजक संस्था ईडब्लूसीडब्लीएफका सीईओ राल्फ राइशेर्टले भनेका छन्, “क्रिस्टियानो रोनाल्डो जस्तो महान् खेलाडीको साथ पाउनु ई-स्पोर्ट्स कम्युनिटीका लागि सम्मानको कुरा हो । उनले नयाँ पुस्तालाई प्रेरणा दिनेछन् ।”

रोनाल्डोले कार्यक्रमभरि ई-स्पोर्ट्स विश्वकपको विश्वव्यापी अभियानको नेतृत्व गर्नेछन् भने यसको रचनात्मक विषयवस्तु ‘राइज अबभ’ (Rise Above) लाई प्रवर्द्धन गर्नेछन् ।

पछिल्लो अध्यावधिक: जेठ ३१, २०८२ ८:३९

जाजरकोट – जाजरकोटमा ट्र्याक्टर दुर्घटना हुँदा एकजनाको मृत्यु भएको छ भने एक जना गम्भीर घाइते भएका छन् । दुर्घटनामा परेका ​नलगाड नगरपालिका–७ बगराका १९ वर्षीय विनोद परियारको उपचारका क्रममा रुकुमपश्चिमको चौरजहारी मिसन अस्पतालमा मृत्यु भएको हो । 

शुक्रबार नलगाड नगरपालिका–७ खगेनकोटस्थित जाजरकोट–डोल्पा सडक खण्डमा सरिया लोड गरी दल्लीदेखि कायाखेत जाँदै गरेको भे १ त ८७११ नम्बरको ट्र्याक्टर दुर्घटना भएको हो ।

दुर्घटनामा गम्भीर घाइते विनोद र १९ वर्षीय जयबहादुर परियारलाई उद्धार गरी उपचारका लागि प्रहरीले नगर अस्पताल दल्ली पठाएको थियो । दल्लीमा प्राथमिक उपचारपछि दुवैलाई रुकुमपश्चिमस्थित चौरजहारी मिसन अस्पताल पठाइएको थियो ।

चौरजहारी मिसन अस्पतालमा उपचारका क्रममा चालक विनोदलाई चिकित्सकले मृत घोषणा गरेको जिल्ला प्रहरी कार्यालयका प्रहरी निरीक्षक सन्तोष चन्दले बताए । जयबहादुरलाई थप उपचारका लागि नेपालगन्ज पठाएको उनले जानकारी दिए ।

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।

इस्लामवाद। पाकिस्तानी सेना प्रमुख असिम मुनिर अमेरिका भ्रमणमा निस्केका छन्।

आज शनिबार अर्थात जुन १४ मा वासिङ्टन डिसीमा अमेरिकी सेनाको २५० औँ वार्षिकोत्सवको समारोहमा उनी बिशेष अतिथिका रूपमा सहभागी हुनेछन्। यो दिन अमेरिकी राष्ट्रपति डोनाल्ड ट्रम्पको ७९ औं जन्मदिन पनि हो। यस अवसरमा राजधानी वासिङ्टनमा परेडको आयोजना गरिनेछ।

मुनिरको पहिलो अमेरिका भ्रमण २०२३ मा भएको थियो, जब उनले तत्कालीन अमेरिकी रक्षा सचिव लोयड अस्टिन, तत्कालीन विदेश सचिव एन्टोनी ब्लिन्केन र संयुक्त राष्ट्रका महासचिव एन्टोनियो गुटेरेससँग भेट गरेका थिए।

तर, मुनिरको भ्रमणअघि नै पाकिस्तान भित्रै भने विरोधका आवाज सुनिन थालेका छन्। पूर्वप्रधानमन्त्री इमरान खानको पार्टी तेहरिक ए इन्साफ (पीटीआई)ले यो भ्रमणका क्रममा विरोध गर्ने धम्की दिएको छ। पीटीआईका विदेश मामिला सचिव सज्जाद बुर्कीले शनिबार वाशिंगटनस्थित पाकिस्तानी दूतावास बाहिर प्रदर्शन गर्न अपील गरेका छन्। उनले एक्स टेल द ह्वाइट हाउसमा लेखेका छन् कि पाकिस्तानका जनताले यो सरकारसँग कुनै पनि सम्झौता स्वीकार गर्दैनन् पनि भनेका छन्।

मुनीरको भ्रमण अघि पाकिस्तानका सम्बन्धमा अमेरिकाको बोलीमा पनि परिवर्तन आएको देखिन्छ। अमेरिकाको सेन्ट्रल कमाण्डका प्रमुख जनरल माइकल कुरिल्लाले अमेरिकाले भारत र पाकिस्तान दुवैसँग सम्बन्ध कायम राख्नुपर्ने बताएका छन्।

उनले इस्लामिक स्टेट खोरासान (आईएसआई–के) को खतरासँग लड्न पाकिस्तानी सेना आवश्यक रहेको बताए। मंगलबार संसदको सशस्त्र सेवा समितिको बैठकमा उनले यस्तो बताएका हुन्।

जनरल कुरिल्लाले आतंकवाद विरुद्धको लडाईमा पाकिस्तान बलियो सहयोगी भएकोसमेत बताएका छन्। उनले भने,‘अमेरिकाले पाकिस्तान र भारत दुवैसँग सम्बन्ध कायम राख्नुपर्छ । यो बाइनरी स्विच होइन कि यदि तपाइँसँग एकसँग सम्बन्ध छ भने तपाइँ अर्कोसँग सम्बन्ध राख्न सक्नुहुन्न। हामीले सम्बन्धको फाइदाहरू हेर्नुपर्छ।’

काठमाडौँ –अहिले कोशी, मधेश, बागमती, गण्डकी प्रदेशका केही भू–भाग र लुम्बिनी प्रदेशका पूर्वी क्षेत्रका थोरै भू–भागमा मनसुनी वायुको प्रभाव रहेको छ । साथै देशको पश्चिम भू–भागमा पश्चिमी वायु तथा स्थानीय वायुको प्रभाव रहेको छ । 

जल तथा मौसम बिज्ञान विभाग, मौसम पूर्वानुमान महाशाखाका अनुसार अहिले देशभर आंशिकदेखि साधारणतया बदली रहेको छ । गण्डकी प्रदेशका केही स्थानहरूमा, बागमती, लुम्बिनी र सुदूरपश्चिम प्रदेशका थोरै स्थानहरूमा तथा कर्णाली प्रदेशका एक–दुई स्थानहरूमा मेघगर्जन/चट्याङसहित हल्कादेखि मध्यम वर्षाको भइरहेको छ । गण्डकी प्रदेशका थोरै स्थानहरूमा तथा बागमती प्रदेश, लुम्बिनी प्रदेश र सुदूरपश्चिम प्रदेशका एक/दुई स्थानहरूमा भारी वर्षासमेत भैरहेको छ ।

आज दिउँसो देशभर आंशिकदेखि साधारणतया बदली रहने महाशाखाले जनाएको छ । कोशी र मधेश प्रदेशलगायत देशका पहाडी भूभागका थोरै स्थानहरू र बाँकी भू–भागका एक–दुई स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको छ । कोशी प्रदेशका पहाडी भू–भागका एक–दुई स्थानमा भारी वर्षाको पनि सम्भावना रहेको महाशाखाले जनाएको छ ।

कोशी, बागमती र गण्डकी प्रदेशका उच्च–पहाडी तथा हिमाली भू–भागका थोरै स्थानहरू तथा बाँकी उच्च÷पहाडी तथा हिमाली भू–भागका एक–दुई स्थानमा हल्का वर्षा/हिमपातको सम्भावना रहेको छ ।

आज राति देशभर आंशिकदेखि साधारणतया बदली रहनेछ। कोशी, मधेश, बागमती र गण्डकी प्रदेशको धेरै स्थानहरू, लुम्बिनी र सुदूरपश्चिम प्रदेशका केही स्थानहरू तथा बाँकी भू(भागका थोरै स्थानहरूमा मेघगर्जनरचट्याङसहित हल्कादेखि मध्यम वर्षाको सम्भावना रहेको छ ।

कोशी र मधेश प्रदेशका थोरै स्थानहरूमा तथा बागमती, गण्डकी, लुम्बिनी र सुदूरपश्चिम प्रदेशका एक/दुई स्थानमा भारीदेखि धेरै भारी वर्षाको पनि सम्भावना रहेको महाशाखाले जनाएको छ । 

नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।