काठमाडौँ । केही दिनदेखि सामाजिक सञ्जाल फेसबुकमा प्रहरीले रातिको समयमा महिलालाई कुटेको देखिने एउटा भिडिओले चर्चा पाइरहेको छ । काठमाडौं ठमेलको एउटा नाइट क्लबमा प्रहरी सिभिल ड्रेस छिरेको र अश्लीलताले सीमा नाघेको फेला परेपछि कारबाही गरेको भन्ने दाबी गरिएको छ । टेकपाना फ्याक्टचेकले यो घटना नेपालको नभइ पेरुको भएको र आजभन्दा १० वर्षअघि २०१४ मा भएको पत्ता लगाएको छ ।

दाबी 

बिहीबार १७ अप्रिल २०२५ मा ‘रेज योर भ्वाइस’ नामको फेसबुक पेजबाट एउटा भिडिओ पोस्ट भयो । भिडिओमा केही प्रहरी जस्तो देखिने व्यक्तिले रातिको समयमा केही महिलाहरू कुटिरहेको देखिन्छ । १ मिनेट २७ सेकेन्डको उक्त भिडिओको क्याप्सनमा लेखिएको छ, “Kathmandu Thamel को एक night club मा पुलिस सिबिल ड्रेसमा छिरे पछिको अबस्था। अश्लीलताको सीमा नाघेपछि सुरक्षाकर्मी छिर्नु पर्ने बाध्यता भयो ।”

यो सामग्री तयार पार्दासम्म उक्त भिडिओमा २७२ रियाक्सन, ४१ कमेन्ट र ८५ हजार बढी भ्युज आएको छ । हेर्नुहोस् ओरिजिनल भिडिओ र आर्काइभ भिडिओ  ।

फेसबुकमा आयुष क्षेत्री (ओरिजिनल भिडिओ र आर्काइभ भिडिओ), मिशन नेपाल (ओरिजिनल भिडिओ र आर्काइभ भिडिओ), युथ अफ बुद्धशान्ति (ओरिजिनल भिडिओ र आर्काइभ भिडिओ), सजन गुरुङ खवास (ओरिजिनल भिडिओ र आर्काइभ भिडिओ) लगायतका फेसबुक पेज तथा प्रयोगकर्ताले यो भिडिओ राखेका छन् ।

यी सबैले यो भिडिओ काठमाडौं ठमेलमा भएको एउटा नाइट क्लबको भन्ने दाबी गरेका छन् । तर नाइट क्लबको नाम के हो भन्ने राखेका छैनन् ।

तथ्यजाँच 

टेकपाना फ्याक्टचेक टिमले इनभिड टुल प्रयोग गरेर भाइरल भिडिओको कीफ्रेम निकाल्यो । त्यसमध्यको एउटा कीफ्रेमलाई गुगल लेन्समा reverse image search गर्दा भाइरल भिडिओमा देखिएकी युवतीको फोटो फिचर भएको mangalore today को ‘Peru Moral Police wip Nightclub Employees’ शीर्षकको समाचार फेला पार्‍यो । 

त्यसमा तीन ओटा फोटो फिचर भएका छन् । नेपालमा भाइरल भइरहेको भिडिओमा देखिने युवती र उक्त समाचारमा राखिएका फोटोमा देखिने युवतीको फोटो मिलेको पायौं ।

मंगलोर टुडेले यो घटना पश्चिमी पेरुमा भएको उल्लेख गरेको छ । तर यो कहिलेको समाचार हो भन्ने उल्लेख नभएको पाइएपछि हामीले पश्चिमी पेरुको नाइट क्लबमा यौनकर्मी महिला भन्ने  आशयका समाचार खोज्यौं । यसका लागि हामीले गुगलमा ‘Peru nightclub prostitution’ भन्ने कीवर्ड्स खोज्यौं । त्यस क्रममा फक्स न्युजले राखेको समाचार फेला पर्‍यो । 

नेपालमा भाइरल भइरहेको भिडिओको कीफ्रेम र फक्स न्युजले उक्त समाचारमा राखेको फिचर फोटो दाँजेर हेर्‍यौं । फोटो मिल्यो ।

७ जनवरी २०१४ मा ‘Euronews’ ले राखेको भिडिओको शीर्षक “Video: Vigilantes chase, whip women in ‘anti-prostitution’ raid on Peru night club” मा उक्त भिडिओ हेर्न सकिन्छ । हेर्नुहोस् भिडिओ ।

मंगलोर टुडे, फक्स न्युज र युराे न्युजका अनुसार यो ९ जनवरी २०१४ भन्दा अगाडिको उत्तरी पेरुमा रहेको काजामार्का सहरमा रहेको एउटा नाइट क्लबको घटना हो । उक्त नाइट क्लबमा पहिले केही नकाबधारी मान्छे छिरेका थिए । पछि उनीहरूले आफूलाई ‘सिटी सेक्युरिटी फोर्स’ भनेर चिनाए ।

यी मानिसहरूले क्लबमा काम गर्ने महिलाहरू (जो सम्भावित यौनकर्मी थिए) लाई पिटे, लाइनमा उभ्याए, कोहीको लुगा अधुरो थियो र उनीहरू डरले रुँदै थिए । क्लबमा रहेका बार टेन्डर र बाउन्सरहरूलाई पनि घुँडा टेकेर पुशअप गराए ।

उनीहरूले क्लबमा चोरहरू लुकेका छन् भन्ने सूचना पाएपछि छापा मारेको बताएका थिए । तर त्यहाँ कोही चोर फेला परेनन् । उनीहरूको भनाइ अनुसार त्यो उनीहरूको ‘अपराध र वेश्यावृत्तिको अन्त्य गर्ने प्रयास’ थियो । फक्स न्युजका अनुसार पेरुमा १८ वर्षभन्दा माथिका महिलाका लागि वेश्यावृत्तिले कानुनी रूपमा मान्यता छ । तर महिलाले नगरपालिका कार्यालयमा दर्ता भएर स्वास्थ्य प्रमाणपत्र लिनुपर्छ । तर धेरैजसो यौनकर्मीहरू अनौपचारिक रूपमा काम गर्थे, जसले गर्दा उनीहरू हिंसा र स्वास्थ्य समस्या भोग्न बाध्य हुने गरेको समाचार माध्यमले उल्लेख गरेका छन् ।

दाबी

काठमाडौंको ठमेलको एउटा नाइट क्लबमा वेश्यावृत्ति भइरहेको भन्ने थाहा पाएपछि सिभिलमा खटिएको प्रहरीले छापा मार्‍यो ।

दाबीकर्ता

Raise your voice, Aayush Xettri, Mission nepal, Sajan gurung khawas, Youth of buddhashanti लगायतका फेसबुक पेज र प्रयोगकर्ता ।

तथ्य

काठमाडौं ठमेलमा वेश्यावृत्ति बढ्दै गएपछि सिभिलमा खटिएको प्रहरीले एक नाइट क्लबबाट त्यसमा संलग्न महिलालाई कुट्दै बाहिर निकाल्यो भन्ने दाबी केही नेपाली फेसबुक पेज र प्रयोगकर्ताले गरेका छन् । तर यो भिडिओ नेपालको नभएर उत्तर पेरुको एक सहरको नाइट क्लबको रहेको पुष्टि भएको छ ।

निष्कर्ष

काठमाडौं ठमेलमा वेश्यावृत्ति बढ्दै गएपछि सिभिलमा खटिएको प्रहरीले एक नाइट क्लबबाट त्यसमा संलग्न महिलालाई कुट्दै बाहिर निकाल्यो भन्ने दाबी भ्रमपूर्ण रहेको पाइएको छ । यो घटना नेपालको नभइ पेरुको उत्तरी क्षेत्रमा भएको एक सहरको नाइट क्लबको हो । यो आजभन्दा १० वर्ष अगाडि सन् २०१४ मा भएको घटना हो । नेपालका केही फेसबुक पेज र प्रयोगकर्ताले काठमाडौं ठमेलको भन्दै भ्रामक भिडिओ फैलाएका हुन् ।

प्रतिक्रिया

तपाईंले हाम्रो वेबसाइट, सामाजिक सञ्जालका ह्यान्डल (फेसबुक, इन्स्टाग्राम, टिकटक, एक्स, युट्युब, लिङ्क्डइन) वा [email protected] मा तथ्य जाँच गर्नुपर्ने सामाजिक सञ्जालका पोस्ट पठाउन सक्नु हुनेछ । तथ्य जाँचलाई लिएर कुनै प्रतिक्रिया वा सुझाव भए हामीलाई ईमेल पठाउनु होला ।

पछिल्लो अध्यावधिक: बैशाख ६, २०८२ १८:५२

काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले देशमा देखिएको प्रतिगामी षड्यन्त्र सफल हुन नदिने बताएका छन् । 

शनिबार काठमाडौंमा नेवाः राष्ट्रिय मुक्ति मोर्चाको राष्ट्रिय सम्मेलन उद्घाटन गर्दै प्रचण्डले सरकारका गलत काम, क्रियाकलापको कारण प्रतिगामी तत्वले धमिलो पानीमा माछा मार्ने दुष्साहसजस्तो गरेको भन्दै त्यसलाई सफल हुन नदिने बताएका हुन् । 

तत्कालीन समयमा संविधान नबन्ने देखिएपछि केही विषयमा सम्झौता गरिएको भन्दै उनले अब यथास्थीतिवाद र प्रतिगामी षडयन्त्रविरुद्ध सबै उत्पीडित वर्ग र जाति समूदाय अगाडी बढ्नुपर्ने बेला आएको धारणा राखे । 

प्रचण्डले अन्य दलसँग तालमेल गरेर अघि बढ्दा त्यसको परिणाम जनतामा राम्रो नभएकाले आफ्नै बलमा निर्वाचन लड्नका लागि पार्टीलाई बलियो बनाउने अभियानमा आफू रहेको बताए ।

उनले राष्ट्रिय विभूति शंखधर साख्वाको सम्मान र आदर्शलाई पछ्याउँदै गरिब किसानहरुको ३० हजारसम्मको ऋण मिनाह गर्ने निर्णय आफू प्रधानमन्त्री हुँदा गरेको स्मरण गरे । 

उनले नेवार समूदायको समूदाय, भाषा, पहिचान स्थापीत नभएसम्म माओवादीले साथ नछाड्ने प्रतिबद्धता जनाए ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं। गायक तथा संगीतकार हेमन्त कान्छा रसाईलीको ‘जानै लाग्यो वैँश रिमई’ बोलको गीतको भिडियो सार्वजनिक गरिएको छ।

विदाईको समयमा हुने रुवाबासी र मन कटक्क खाने दृश्यहरुसहितको भिडियोमा गायक तथा सारंगीवादक हेमन्त कान्छा रसाईली र गायिका देवीघर्तीको जादुमयी स्वर सुन्न सकिन्छ।

गीतमा राजकुमार बगरका शब्द सृजना रहेको छ भने मिक्सिगं र मास्टरिङ एचबिएन किस्मतको रहेको छ। गायक स्वयमकै संगीत रहेको गीतको भिडियोमा हेमन्तसँग लक्ष्मी थापा मगरको अभिनय देख्न सकिन्छ। मोडलद्धय हेमन्त र लक्ष्मी मज्जैसँग अभिनयमा खुलेका छन्।

भिडियोमा एक प्रेमील जोडीको प्रेमील कल्पना, मायामा डुबेको प्रेमजोडी र रोमान्सले भरिएको समयदेखि छुट्दासम्मको विरहको गाथालाई निर्देशक एकिन्द्र शाराशंकरले कलात्मक शैलीमा प्रस्तुत गरेका छन् ।

करण चैसियारको छायांकन, प्रविण भट्टको सम्पादन तथा कलर रहेको सार्वजनिक गीतको भिडियो गायक रसाईली स्वयंकै युट्युब च्यानलबाट बजारमा आएको हो ।

काठमाडौं । सामाजिक सञ्जालमा देखिएको एउटा छोटो भिडिओ (युट्युब शर्ट्स) नभएको भए कोलकाताको बेहालास्थित एक परिवारले आफ्नो घरबाट सुनका गहना हराएको सायदै थाहा पाउने थियो । यसै महिनाको सुरुमा सार्वजनिक भएको त्यही भिडिओको प्रमाणका आधारमा स्थानीय प्रहरीले उक्त परिवारकी पूर्व घरेलु कामदार ३५ वर्षीया पूर्णिमा मण्डललाई पक्राउ गरेको छ । 

भारतीय सञ्चारमाध्यम टाइम्स अफ इन्डियाका अनुसार चोरी भएको करिब छ महिनापछि प्रहरीले उनको साथबाट तीन ओटा सुनका गहना बरामद गरेको हो । युनिक पार्ककी उद्यमी सञ्चिता मुखर्जीले तीन वर्षअघि मण्डललाई आफ्नो घरमा काम गर्न राखेकी थिइन् । मण्डलले गत अक्टोबरमा अचानक काम छोडिन् । हालै मात्र सञ्चिता र उनका श्रीमान् समिरनले घरबाट गहना हराएको थाहा पाएका थिए ।

“पूर्णिमा मण्डललाई युट्युबमा ‘शर्ट्स’ अपलोड गर्ने धुन चढेको थियो । उनी सडकमै नाचेर भिडिओ हाल्थिन् । तर, निरक्षर भएकाले कमेन्ट सेक्सनका प्रतिक्रिया पढ्न सक्दैनथिन् र प्रायः मसँग मद्दत माग्थिन् । मैले यस्तै एउटा शर्ट भिडिओ हेर्दै थिएँ, त्यतिबेला मैले उनले मेरै गहना लगाएको थाहा पाएँ,” मुखर्जीले टाइम्स अफ इन्डियालाई घटनाको बेलीविस्तार लगाइन् ।

मुखर्जीले प्रहरीमा दिएको उजुरीमा लेखेकी छिन्, “गत अक्टोबरदेखि मेरो घरबाट दुई ओटा सुनका झुम्का हराएका थिए । अप्रिलको पहिलो हप्तामा मैले पूर्णिमा मण्डलले मेरा हराएका सुनका झुम्कामध्ये एउटा लगाएर युट्युब शर्ट्स भिडिओ पोस्ट गरेको थाहा पाएँ । मैले उक्त भिडिओ मेरो मोबाइलमा सुरक्षित राखें । उनले मेरो घरमा काम गर्दा नै ती दुई झुम्का चोरेकी हुन् भन्ने मलाई शङ्का छ ।”

उजुरीपछि पर्णश्री प्रहरीले पूर्णिमाको घरमा छापा मारेर मुखर्जीका दुई ओटा झुम्का मात्र नभई उनका श्रीमानको एउटा औंठी पनि बरामद गरेको छ ।

एक वरिष्ठ अनुसन्धान अधिकृतले स्थानीय सञ्चार माध्यमलाई भने, “हामीले घटनाको अनुसन्धान गरिरहेका छौं र पूर्णिमाले काम गरेका अन्य घरहरूबाट पनि चोरी भएको हुनसक्ने अनुमान गरेका छौं ।”

“साँच्चै भन्नुपर्दा मेरो पूर्व कामदारले अरू केही चोरेको छ कि छैन मलाई थाहा छैन । किनकि मैले मेरो पूरै घर जाँच्न सक्दिनँ । तर प्रहरीले मेरो उजुरीलाई गम्भीरतापूर्वक लिएर तुरुन्तै कारबाही गरेकोमा म आभारी छु,” मुखर्जीले भनेकी छन् ।

पछिल्लो अध्यावधिक: बैशाख ६, २०८२ १७:१५

काठमाडौं– प्रमुख तीन दलका शीर्ष नेताहरू छलफलमा जुटेका छन् ।

संक्रमणकालीन न्यायलगायत विषयमा छलफल गर्न प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच अहिले छलफल चलिरहेको हो ।

छलफलमा गृहमन्त्री रमेश लेखक र प्रधानमन्त्रीका संक्रमणकालीन न्यायसम्बन्धी सल्लाहकार अग्नि खरेल पनि सहभागी छन् ।

यसअघि गत चैत ११ गते तीनै शीर्ष नेतासहित संक्रमणकालीन न्यायसम्बन्धी दुई आयोगमा पदाधिकारी सिफारिस गर्न पुनः समिति बनाउने सहमति जुटेको थियो ।

पूर्वप्रधानन्यायाधीश ओमप्रकाश मिश्रको संयोजकत्वमा सिफारिस समिति गठन पनि गरिएको थियो ।

समितिमा पूर्वमहान्यायाधिवक्ता खम्मबहादुर खाती, पूर्वराजदूत डा. अर्जुनबहादुर कार्की र मानव अधिकारकर्मी स्टेला तामाङ र लिली थापा सदस्य छन् ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

काठमाडौं । रुपन्देहीको कोटहीमाई गाउँपालिका–१ परसपुरवास्थित सडकमा मोटरसाइलबाट खसेर महिलाको मृत्यु भएको छ।

युपि जेड ०३८८ नम्बरको मोटरसाइकलबाट खसेर सवार भारत कोहारगड्डी टोला बस्ने ६५ वर्षीय राजवन्ती मल्लाहको मृत्यु भएको हो।

दुर्घटना गम्भीर घाइते भएकी उनको सिटी अस्पतालमा उपचारका लागि लगिएकोमा उपचारकै क्रममा उनको मृत्यु भएको प्रहरीले जनाएको छ। मोटरसाइकल चालक फरार छन्।

एजेन्सी–डेमोक्र्याटिक रिपब्लिक अफ कङ्गोमा इन्धन बोकेको डुङ्गामा आगलागी हुँदा कम्तीमा १४३ जनाले ज्यान गुमाएका छन् भने धेरैजना अझै बेपत्ता रहेका छन्।

यो दुखद दुर्घटना इक्वेटोर प्रान्तको राजधानी म्बान्डाका नजिकै, विश्वकै सबैभन्दा गहिरो र विशाल कङ्गो नदीको सङ्गमस्थलमा भएको हो।

स्थानीय नागरिक समाजका नेता जोसेफ लोकोन्डोका अनुसार, केही व्यक्तिको मृत्यु आगोमा जलेर र केहीको डुबेर भएको पुष्टि भएको छ। उहाँले मृतक संख्या १४५ पुगेको अनुमान गरेका छन्।

डुङ्गामा खाना पकाउने क्रममा लागेको आगो इन्धनमा फैलिँदा ठूलो विस्फोट भई आगलागी भएको बताइएको छ।

सामाजिक सञ्जालमा सार्वजनिक भिडियोहरूमा डुङ्गाबाट आगो सल्किरहेको र धुवाँ निस्किरहेको देखिन्छ। डुङ्गा किनाराबाट टाढा फसेको अवस्थामा देखिएको छ।
घाइतेहरूलाई उद्धार गरी अस्पतालमा उपचारको लागि पठाइएको जनाइएको छ। धेरै परिवारहरू आफ्ना प्रियजनहरूको अवस्थाबारे अझै अनविज्ञ रहेको पनि लोकोन्डोले बताए।
प्रभावित परिवारहरूप्रति हार्दिक समवेदना व्यक्त गर्दै, स्थानीय अधिकारीहरूले आवश्यक उद्धार तथा राहत कार्य तीव्र रुपमा अगाडि बढाइरहेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।