काठमाडौं – उपत्यकामा वायु प्रदूषण उच्च बिन्दुमा पुगेकाले मानिसको समग्र स्वास्थ्य फोक्सो, मुटुसँगै आँखामा पनि समस्या देखिन थालेको छ।
विषाक्त धुँवा, धुलोका कण, विषाक्त रसायन तथा दुर्गन्धका कारण वायु प्रदूषण बढिरहेको छ। सास फेर्ने क्रममा वायुसँगै यस्ता विषाक्त तत्त्व पनि हाम्रो शरीरमा प्रवेश भइरहेका हुन्छन्। हाम्रो आँखा प्रदूषित वायुको प्रत्यक्ष सम्पर्कमा हुन्छन्। हामी विषाक्त वायुले फोक्सोमा असर नहोस् भनेर मास्क प्रयोग गर्छौं, तर आँखाका लागि भने खासै ध्यान कसैले पनि दिएको हुँदैन। त्यसैले आँखामा पनि विभिन्न खालका समस्या देखिन थालेको चिकित्सक बताउँछन्।
आँखालाई बचाउने पाँच उपाय
१. चश्माको प्रयोग गर्नुहोस्
अल्ट्राभायोलेट किरण (यूभी रेज)बाट सुरक्षा भएको राम्रो सन ग्लासमा लगानी गर्नुहोस्। यसले तपाईंको आँखालाई हानिकारक किरणहरूबाट जोगाउन सक्छ। साथै धुलो र प्रदूषकहरू विरुद्ध अवरोधको रूपमा काम गर्न सक्छ। यसले तपाईंलाई अरुको अगाडि स्मार्ट पनि देखाउँछ।
२. नियमित पानी पिउनुहोस्
दिनभर शरीरलाई हाइड्रेटेड राख्नको लागि नियमित पानी पिउने बानी बसाल्नुहोस्। एकैपटक धेरै पानी पिउने भन्दा थोरै थोरै पानी नियमित रुपमा पिउनाले शरीरलाई फ़ुर्तिलो बनाई राख्छ। प्रत्येक दिन आठ गिलास पानी पिउने बानी गर्नुहोस्।
३. आँखामा पानी नछ्याप्नुहोस्
हामी मध्ये धेरैको नुहउँदा वा मुख धुँदाखेरी आँखामा पानी छ्याप्ने बानी हुन्छ। यसो गर्नाले आँखाको आँसुले राम्रोसँग काम नगर्ने हुँदा आँखा सुख्खा हुने, विझाउने, पोल्ने समस्या देखिन सक्छ। त्यसैले यस्तो बानी छ भने आजबाटै त्याग्नुहोस्।
४. राम्रो सँग हात धुने बानी गर्नुहोस्
कुनै पनि सामान छोइसकेपछि वा चलाइसकेपछि राम्रोसँग साबुनपानीले हात धुने बानी बसाल्नुहोस्। आँखालाइ बारबार चिलाउने वा छोइरहने गर्नाले आँखाको संक्रमण हुने खतरा बढ्दछ त्यसैले यसबाट बच्न आफ्नो सरसफाईमा विशेष ध्यान दिनुहोस्।
५. समयमै उपचार
आँखा दुख्ने पोल्ने वा जलन भएमा आइसले सेक्नुहोस्। कुनै पनि औषधि प्रयोग गर्नु अघि वा लक्षणहरू रहेमा विशेषज्ञहरूद्वारा आँखा परीक्षण गर्नुहोस्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
सामाग्री श्रोत :
नेपाललाइभ
