काठमाडौं । यदि तपाईं आफ्नो धेरैजसो काम ल्यापटपमा गर्नुहुन्छ वा बोकेर हिँड्नुपर्ने हुन्छ भने, सबै ठाउँमा चार्ज गर्ने सुविधा नपाइने हुन सक्छ । यस्तो अवस्थामा ल्यापटपको ब्याट्री जोगाउने उपाय अपनाउनुपर्छ । यसको सबैभन्दा सजिलो तरिका भनेको तपाईंको ल्यापटपमा कुन एपले सबैभन्दा बढी ब्याट्री खपत गरिरहेको छ भनेर पत्ता लगाउनु हो ।
एकपटक तपाईंलाई थाहा भयो कि कुन एपले बढी ब्याट्री खपत गरिरहेको छ भने, त्यसलाई कम प्रयोग गर्न सकिन्छ वा आवश्यक नभएको एप अनइन्स्टल गरेर ब्याट्री र स्टोरेज दुवै जोगाउन सकिन्छ ।
विन्डोजमा कसरी एप ट्र्याक गर्ने ?
- ‘Start Menu’ खोल्नुहोस् र ‘Settings’ मा जानुहोस् ।
- ‘System’ मा क्लिक गरी ‘Power & Battery’ अप्सन खोल्नुहोस् ।
- अब ‘Battery Usage’ मा क्लिक गर्नुहोस् । यहाँ तपाईंले कुन एपले कति ब्याट्री खपत गरिरहेको छ भन्ने जानकारी पाउनुहुन्छ ।
- सर्चबार प्रयोग गरेर कुनै विशेष एपको ब्याट्री खपत हेर्न सकिन्छ ।
- धेरै ब्याट्री खपत गर्ने एप ब्याकग्राउन्डमा नचल्ने बनाउने वा आवश्यक नभए अनइन्स्टल गर्न सकिन्छ
म्याकमा कसरी एप ट्र्याक गर्ने?
- मेनु बार (स्क्रिनको माथिल्लो दायाँ भाग) मा रहेको ब्याट्री आइकन मा क्लिक गर्नुहोस् ।
- खुल्ने मेनुमा ‘Using Significant Energy’ भन्ने अप्सनमा सबैभन्दा धेरै ब्याट्री खपत गर्ने एपहरूको सूची देख्न सकिन्छ ।
- यदि सूचीमा रहेको कुनै एप हाल प्रयोगमा छैन भने, त्यसलाई बन्द गर्न सकिन्छ ।
- एप बन्द गर्न त्यसमा राइट क्लिक गरेर ‘Quit’ अप्सन चयन गर्नुहोस् ।
- ध्यान दिनुहोस्, यदि कुनै एप सक्रिय रूपमा प्रयोग भइरहेको छ भने त्यसलाई बन्द गर्न मिल्दैन । तर ब्याकग्राउन्डमा चलेको एपलाई बन्द गरेर ब्याट्री बचाउन सकिन्छ ।
पछिल्लो अध्यावधिक: चैत २१, २०८१ १३:४३
सामाग्री श्रोत :
टेक पाना
