काठमाडौँ – प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबिच थाइल्यान्डमा भेटवार्ता हुने भएको छ।
शिखर सम्मेलनका दौरान दुई मुलुकका प्रधानमन्त्रीबीच शुक्रवार ४ बजे साइडलाइन वार्ता हुने तय भएको परराष्ट्र मन्त्रालय स्रोतले जानकारी दिएको हो।
प्रधानमन्त्री ओली र मोदीबिच थाइल्यान्डमा भेटघाट गराउने प्रयास सुरुदेखि नै भइरहेको थियो। तर भारतका तर्फबाट निश्चित भइरहेको थिएन। नेपालबाट लगातारको प्रयासले दुई प्रधानमन्त्री बिचमा अन्तिम समयमा भेटवार्ता हुने निश्चित भएको हो।
नेपालका प्रधानमन्त्री ओली हिजै थाइल्यान्ड पुगिसकेका छन् भने भारतका प्रधानमन्त्री मोदी भोलि थाइल्यान्ड पुग्नेछन्। मोदी उतैबाट श्रीलङ्का जाने कार्यक्रम रहेको छ। श्रीलङ्का उड्नुअघि प्रधानमन्त्री अोलीसँग भेटघाटको समय राखिएको श्रोतले बताएको छ।
भारतका प्रधानमन्त्री मोदी अप्रिल ४ मा थाइल्यान्डबाट श्रीलङ्का प्रस्थान गर्ने कार्यक्रम छ। उनी श्रीलङ्काबाट अप्रिल ६ मा भारत फर्किने छन्। यता प्रधानमन्त्री ओली थाइल्यान्डबाट अप्रिल ५ अर्थात् चैत २३ गते नेपाल फर्किने कार्यक्रम रहेको छ।
परराष्ट्र मन्त्रालयका प्रवक्ता कृष्णप्रसाद ढकालले बिमस्टेक समिटमा विभिन्न देशका राष्ट्रप्रमुखसँग भेटघाट हुने र सोही क्रममा भारतीय प्रधानमन्त्री मोदीसँग पनि प्रधानमन्त्री ओलीको भेटघाटको हुने बताए।
‘विभिन्न देशका राष्ट्रप्रमुखसँग साइडलाइन भेटघाटको तयारीका क्रममा भारतका प्रधानमन्त्री मोदीसँग पनि भेटघाटको तयारी गरिएको हो, बाँकी समय तालिका त्यहीँबाट मिलाउने काम हुन्छ’ उनले भने।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
सामाग्री श्रोत :
नेपाललाइभ
