वासिङ्टन- अमेरिकी राष्ट्रपति डोनाल्ड ट्रम्प प्रशासनले मंगलबार अमेरिकी स्वास्थ्य एजेन्सीहरूमा कार्यरत दश हजारभन्दा बढी कर्मचारीलाई हटाउन सुरु गरेको छ।विभिन्न स्रोतहरूका अनुसार केही कर्मचारीहरूलाई बर्खास्तको सूचना प्राप्त गरेको केही घण्टामै सुरक्षा गार्डहरूले कार्यालय प्रवेश गर्न रोक लगाएका छन्।अमेरिकाले स्वास्थ्य तथा मानव सेवा विभाग (एचएचएस ) अन्तर्गतका उच्च पदस्थ कर्मचारीदेखि तल्लो तहका कर्मचारीहरुको कटौती गरेको हो। स्वास्थ्य क्षेत्रका महत्वपूर्ण निकायहरु फूड एन्ड ड्रग एडमिनिस्ट्रेशन (एफडिए), रोग नियन्त्रण तथा रोकथाम केन्द्र (सिडिसी) र राष्ट्रिय स्वास्थ्य संस्थान (एनआइएच) का कार्मचारीहरु कटौतीमा परेका छन्।धेरै कर्मचारीहरुले कार्यालयको गेटमा पुगेपछि मात्र आफ्नो जागिर गुमेको जानकारी पाएका छन्। जागिर गएका कर्मचारीहरुलाई सुरक्षा गार्डले गेटमा नै रोकेपछि मात्र कर्मचारीहरुले आफ्नो जागिर गुमेको चाल पाएका हुन्।जागिर गुमेपछि एफडिए, एनआइएच र सिडिसीका कार्यालय अगाडि सयौँ कर्मचारीहरू अनिश्चिततामा परेका देखिन्थे। एनआइएचको बेथेस्डास्थित क्याम्पस र रकभिल स्थित एचएचएसको कार्यालयमा प्रवेश गर्न खोज्ने कर्मचारीहरूको लामो लाइन लागेको थियो। केहीलाई सुरक्षा गार्डद्वारा प्रवेशद्वारमै ‘तपाईंलाई जागिर बाट निकालिएको छ’ भन्ने टोकन दिइएको थियो।राष्ट्रपति ट्रम्प र उनका समर्थक एलन मस्कले संघीय सरकारको भारलाई सकेसम्म घटाउने तथा खर्च कटौती गर्ने योजना अनुसार यो निर्णय लिइएको हो।स्वास्थ्य सचिव रोबर्ट एफ केनेडी जुनियरले यी कटौतीलाई ‘अत्यावश्यक सुधार’ भन्दै समर्थन गरेका छन्। यस निर्णयसँगै स्वास्थ्य, क्यान्सर अनुसन्धान, खोप तथा औषधि अनुमोदनमा संलग्न वैज्ञानिकहरू हटाइएका छन्, जसले अमेरिका स्वास्थ्य संकटहरू-जस्तै हालको दादुरा प्रकोप र बर्ड फ्लू-सामना गर्न सक्ने क्षमतामा प्रश्न उठाएको छ।‘हामी ती सबै कर्मचारीहरूका लागि दुःखी छौँ, जसले आफ्नो जागिर गुमाए,’ केनेडीले एक्स (पहिलेको ट्विटर) मा लेखेका छन्, ‘तर हामीले स्पष्ट रूपमा बुझ्नुपर्छ कि अहिले सम्मको प्रणाली प्रभावकारी थिएन। अब, एचएचएसलाई दीर्घरोग रोकथाममा केन्द्रित गराउन आवश्यक छ।‘एफडिएका न्यू ड्रग्स अफिसका निर्देशक पिटर स्टाइनले बर्खास्त हुनुभन्दा पहिले नै राजीनामा दिएका छन्। एफडिएको टोब्याको प्रडक्ट्स डिभिजनका प्रमुख ब्रायन किङलाई हटाइएको छ भने एफडिएका प्रमुख खोप अधिकारी पिटर मार्क्स पनि बर्खास्त भएका छन्।एफडिएका पूर्व कमिस्नर रोबर्ट क्यालिफले लिंक्डइनमा लेखेका छन्, ‘एफडिए अब हामीले चिनेको, देखेको जस्तो छैन। धेरै अनुभवी नेतृत्व हराइसकेको छ। इतिहासले यस निर्णयलाई ठूलो गल्तीको रूपमा मूल्यांकन गर्नेछ।‘एनआइएचको मुख्य क्याम्पसमा कर्मचारीहरूलाई मंगलबार बिहानै हटाइएको सूचना दिइएको थियो। एनआइएचका प्रमुख संक्रामक रोग विशेषज्ञ जीन माराज्जोलाई एनआइएचबाट हटाएर भारतीय स्वास्थ्य सेवामा जागिरको प्रस्ताव गरिएको छ।सिडिसीमा हटाइएका कर्मचारीहरू राष्ट्रिय वातावरणीय स्वास्थ्य केन्द्र, लागू पदार्थ तथा मानसिक स्वास्थ्य सेवा प्रशासन र खोप तथा श्वासप्रश्वास रोगसम्बन्धी राष्ट्रिय केन्द्रमा कार्यरत थिए।
सामाग्री श्रोत :
swasthyakhabar
